Bakıda kürəkən qayınatasını qətlə yetirdi – Təfərrüat

Bakının Binəqədi rayonunda qayınatasını qətlə yetirməkdə ittiham olunan 22 yaşlı Ayxan Hüseynəliyevin barəsində seçilmiş həbs qətimkan tədbirinin uzadılması ilə bağlı istintaq orqanını vəsatətinə baxılıb.

Teleqraf.com-un xəbərinə görə, Binəqədi rayon Məhkəməsində hakim Vüsal Tağıyevin sədrliyi ilə baş tutan iclasda istintaq orqanını vəsatəti təmin olunub.

Ayxan Hüseynəliyevin barəsində seçilmiş həbs qətimkan tədbirinin müddəti 2 aya qədər artırılıb.

İttihama görə, bu ilin avqustun 31-də saat 10 radələrində paytaxtın Binəqədi rayonunun Biləcəri qəsəbəsi ərazisində 1967-ci il təvəllüdlü Xalıq Bağırovun bıçaqlanaraq öldürülməsi barədə rayon prokurorluğuna məlumat daxil olub.

Dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

İstintaqla hadisənin zərərçəkmişin kürəkəni 1998-ci il təvəllüdlü Ayxan Hüseynəliyev tərəfindən şəxsi münasibətlər zəminində aralarında yaranmış münaqişə zamanı çoxsaylı bıçaq xəsarətləri yetirilməklə törədilməsinə əsaslı şübhələr müəyyən edilib.

Ayxan Hüseynəliyev şübhəli şəxs qismində tutularaq istintaqa cəlb olunub.

İlkin istintaqa ifadə verən Ayxan Hüseynəliyev törətdiyi əməli etiraf edib.

Məlum olub ki, Ayxan Hüseynəliyev hadisədən iki ay əvvəl qayınatası və onun ailəsi arasında münaqişə yaranıb.

Mərhum Xalıq Bağırovun qızı Aygün Hüseynəliyeva 3 il əvvəl Ayxan Hüseynəliyevlə ailə həyatı qurub. Qadın iddia edib ki, həyat yoldaşı onu tez-tez döydüyünə görə hadisədən 2 ay əvvəl atasının evinə gəlib. O, hətta boşanmaq üçün məhkəməyə də müraciət edib.

Ayxan Hüseynov isə qayınatasının onun ailəsini dağıtmaqda günahlandırıb və buna görə də qanlı cinayəti törədib.

İstintaq orqanı tərəfindən Ayxan Hüseynəliyevin barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham elan edilib.

Binəqədi rayon Prokurorluğunda istintaq davam edir.