Bakıda 178 min manatlıq dələduzluq edən şəxslə bağlı – Qərar

Bakıda dələduzluq etməkdə ittiham olunan Milli Fədailər Hərəkatının mətbuat katibi Fərid Abdinovun apellyasiya şikayətinə baxılıb.

Teleqraf.com xəbər verir ki, Bakı Apellyasiya Məhkəməsində hakim Zəki Babayevin sədrliyi ilə baş tutan prosesdə qərar elan olunub.

Qərara görə, onun cəzasının yüngülləşdirilməsi barədə verdiyi şikayət təmin olunmayıb.

Qeyd edək ki, Bakı Ağır Cinayətlər Məhkəməsinin hokum ilə Fərid Abdinov 7 il azadlıqdan məhrum edilib.

Qeyd olunub ki, vətəndaşlar Ülkər Əsədova, Kəmalə İsmayılova, Balağa Nəbizadə, Aysel Abdinova və Ellan Eynullayev Daxili İşlər Nazirliyinə müraciət edərək Bakı şəhər sakini Fərid Abdinovun onlara müxtəlif vədlər verərək etibarlarından sui-istifadə etməklə külli miqdarda pul vəsaitlərini ələ keçirdiyini bildiriblər.

Vətəndaşların şikayətləri araşdırılıb və onların F.Abdinov barədə qeyd etdikləri qanunsuz əməllər təsdiqini tapıb.

Müəyyən edilib ki, F.Abdinov dələduzluq yolu ilə zərərçəkənlərin ümumilikdə 178 min manat pulunu ələ keçirib.

Qeyd edək ki, Fərid Abdinovun şəhid ailələrini aldadaraq, onlardan pul alması barədə məlumatlar yayılıb. İddia olunub ki, o, xəstə övladı olan insanlardan müxtəlif məbləğlərdə pul alaraq, onlara müxtəlif vədlər verib, onların etibarından sui-istifadə edərək külli miqdar vəsaitlərini ələ keçirib.