Dövlət Qoruğunda narkotik plantasiyası

Zaqatala Dövlət Təbiət Qoruğu ərazisində çətənə bitkisi əkilib.

Bu barədə Teleqraf.com-a Ekologiya və Təbii Sərvətlər Nazirliyindən məlumat verilib.

Nazirliyin Zaqatala Dövlət Təbiət Qoruğunun “Narkotiklərlə mübarizəyə dair İllik Tədbirlər Planı”na müvafiq olaraq hüquq-mühafizə orqanlarının yerli nümayəndələrini və onların xüsusi texnikasını cəlb etməklə qoruğun ərazisində reyd keçirilib.

Keçirilən reyd zamanı xüsusi texnikanın-helikopter və çəkiliş aparan paraplanların köməkliyi ilə qoruğun Gərəkli sahəsinin mürəkkəb relyefli, uçqun meyilli ərazisində narkotik xassəli çətənə bitkisi olduğu güman edilən 753 ədəd kol aşkar edilib və hüquq-mühafizə orqanlarına təhvil verilib.

Hazırda qoruğun ərazisində narkotik vasitələrin qanunsuz dövriyyəsinə qarşı mübarizə tədbirləri çərçivəsində narkotik xassəli bitkilərin qanunsuz əkildiyi və yabanı halda bitdiyi yerlərin müəyyən edilməsi istiqamətində əməliyyat axtarış tədbirləri davam etdirilir.

Xatırladaq ki, bu il iyulun 3-də Zaqatala Dövlət Təbiət Qoruğunun əməkdaşları qoruğun mürəkkəb relyefli Axkimal sahəsinin ərazisində də reyd keçirərkən ölçüsü 7x8 metr olan sahədə narkotik xassəli çətənə bitkisi olduğu güman edilən kol aşkar etmişdi. Belə ki, sözügedən sahəyə foto-video tələ yerləşdirilərək, əldə edilən video görüntülər nəticəsində ərazidə bir nəfər şübhəli şəxs saxlanılmış, qanun pozucusunun şəxsiyyətinin müəyyən olunması və barəsində qanunamüvafiq tədbirlərin görülməsi üçün Zaqatala Dövlət Təbiət Qoruğu tərəfindən Balakən rayon polis şöbəsinə müraciət edilib.