İrandan metadon gətirən saxlanıldı

Biləsuvar Gömrük İdarəsinin “Qoşa Təpə” gömrük postunda İran İslam Respublikasından Azərbaycan Respublikasına piyada gələn İran vətəndaşı Iranı Qarehqasemlou Alısaheb Mohammadqolı üzərində şəxsi yoxlama zamanı ondan 20 ədəd metadon adlı həb aşkar edilib.

Bu barədə Teleqraf.com-a Dövlət Gömrük Komitəsinin mətbuat xidmətindən məlumat verilib.

Xatırladaq ki, metadon adlı həb “Azərbaycan Respublikasının ərazisində dövriyyəsi məhdudlaşdırılan narkotik vasitələr”in II Siyahısına daxildir və 20 ədəd həbdə metadonun təsiredici maddəsinin ümumi miqdarı 0,4 qram təşkil edir.

Bundan başqa, Biləsuvar Gömrük İdarəsinin “Qoşa Təpə” gömrük postunda İran İslam Respublikasından Azərbaycan Respublikasına piyada gələn Azərbaycan vətəndaşı Əjdər Abuşovun üzərində şəxsi yoxlama zamanı isə onun daxili orqanından (düz bağırsağından) 3 ədəd bükümdə, xalis çəkisi 113,800qram olan narkotik vasitə - heroin aşkar olunub.

Hər iki faktla bağlı təhqiqat aparılır.

Naibə QURBANOVA