Bakıda bağ evlərini qarət edən dəstə zərərsizləşdirildi

Bakının Sabunçu rayonunda bağ evindən oğurluq edən mütəşəkkil dəstənin daha bir neçə üzvü həbs edilib.

Teleqraf.com xəbər verir ki, Nardaran qəsəbəsində bağ evindən oğurluq edən şəxslərin tutulması üçün əməliyyatı Sabunçu Rayon Polis İdarəsinin 14-cü polis bölməsinin əməkdaşları keçirib.

Keçirilən əməliyyat-axtarış tədbirləri nəticəsində dekabrın 8-də Münəvvər Əliyevanın və Hicran Məmmədovanın evlərindən oğurluq etmiş qrupun digər üzvləri - Bakı şəhər sakinləri – 1974-cü il təvəllüdlü İlhamə Babayeva, 1971-ci il təvəllüdlü Ədalət Həsənov və 1990-cı il təvəllüdlü Xaliq Sadıqov tutulublar.

Qeyd edək ki, cari il noyabr ayının 29-dan dekabr ayının 7-dək olan müddətdə Sabunçu rayonunun Nardaran qəsəbəsində Bakı şəhər sakini Münəvvər Əliyevaya məxsus evdən pəncərədən girmək yolu ilə 300 manat və məişət əşyaları oğurlanıb.

Sabunçu Rayon Polis İdarəsinin 14-cü polis bölməsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törədənlərdən paytaxt sakini Nəriman Qədirov tutulub.

Ətrafında aparılmış əməliyyat tədbirləri ilə onun dekabrın 4-də Hicran Məmmədovanın evindən məişət əşyaları və elektrik alətləri oğurlaması da müəyyən edilib.

Hacı Zeynalov