Tanınmış kino xadiminin 60 illiyi qeyd olundu

“Azərbaycanfilm” kinostudiyasında ömrünün 40 ili Azərbaycan kinosuna xidmətdə keçən tanınmış pirotexnika üzrə mütəxəssis Əlibala Məmmədovun 60 yaşı qeyd olunub.

Kinostudiyadan Teleqraf.com-a verilən məlumata görə, kollektiv Əlibala müəllimi 60 illik yubileyi münasibətilə təbrik edib, ona uzun ömür, mədəniyyətimizin və onun ayrılmaz qolu olan kinomuzun inkişafı naminə gördüyü bütün işlərdə uğurlar diləyiblər.

Tədbirdə qeyd olunub ki, Əlibala Məmmədov xüsusən də müharibə mövzusunda olan bütün filmlərdə partlayış, atışma, tüstü, alov effektlərini ustalıqla yaratmaqla ekrandan tamaşaçıya əsl müharibə ab-havasını göstərməyi bacarıb.

Əlibala Məmmədovun 1988-ci ildə Ümumittifaq Dövlət Kinematoqrafiya İnstitutu nəzdində ixtisasartırma kurslarında aldığı təhsil onu daim öz üzərində yorulmadan çalışan, biliyini təkmilləşdirən bir insan kimi xarakterizə edir.

O, peşəkar bir mütəxəssis kimi xarici ölkə kinematoqrafçılarından da dəvət alır, onlarla uğurlu iş birliyi qurur. Onun Türkiyə kinematoqraçıları ilə, “Mosfilm” kinostudiyasının “Dronqo” bədii filmi, Rusiyanın NTV kanalının “Jurnalist” bədii televiziya filmi və digər işləri bunlara bariz nümunədir.

Nərmin