“Biz sizə Brilliant verəcəyik!” - Layihə

“Addım” Gənclər Təşkilatı Azərbaycanda növbəti dəfə sürücülərin və piyadaların yol təhlükəsizliyindən bəhs edən “Road Safety Baku 2015” çərçivəsində “Biz sizə Brilliant verəcəyik!” layihəsinə start verir.

Teleqraf.com xəbər verir ki, layihə Nəqliyyatın İntellektual İdarəetmə Mərkəzi, Norveç Krallığının Azərbaycandakı rəsmi səfirliyi, ASAN Xidmət və Park Bulvar AVM-in dəstəyi ilə gerçəkləşəcək.

“Addım” sədri Hüseyn Cavadzadə bildirib ki, layihə çərçivəsində sürücü və piyadalara məxsusi olaraq Norveçdə hazırlanmış işıq reflektorları paylanacaq: “Müxtəlif aksessuarlar formasında hazırlanan reflektorlar “brilliant konsepsiya”sında dizayn olunub. Bundan başqa layihə çərçivəsində gənc modelyerlər arasında “Yol təhlükəsizliyi” mövzusunda müsabiqə keçirilib. Müsabiqənin qaliblərinin hazırladığı geyimlərdə layihənin reklam siması xalq artisti Brilliant Dadaşovanın iştirakı ilə maraqlı foto çəkimləri baş tutub. Layihənin yekun tədbiri mayın 5-də saat 19-00-da Park Bulvar AVM-də keçiriləcək”.

Qeyd edək ki, tədbirdə dövlət rəsmiləri, KİV nümayəndələri, gənclər, layihənin siması xalq artisti Brilliant Dadaşova və digər ulduzların iştirakı gözlənilir.

Nərmin