Güneydə möhtəşəm gecə: “Azərbaycan qızları…” – 40 min nəfərdən qadınlara dəstək

Təbrizin “Traktor” futbol klubu İranın “Neft” komandasını qəbul edib.

Teleqraf.com xəbər verir ki, “Səhənd” stadionunda baş tutan oyun böyük fərqlə Azərbaycan komandasının xeyirinə yekunlaşıb.

Super liqa yarışlarının 16-cı həftəsində keçirilən oyunun birinci hissəsində heç bir komanda qol vurmayıb. İkinci hissənin 50-ci dəqiqəsində Əşkan Dejaqe, 56-cı dəqiqəsində isə Yukiya Soqita “Traktor”un heyətində fərqlənib.

66-cı dəqiqədə isə “Neft” komandasınun oyunçusunun vurduğu avtoqol matçın ümumi hesabını müəyyən edib. “Traktor” bununla rəqibini 3:0 hesabı ilə məğlub edərək, turnir cədvəlindəki yerini bir qədər də gücləndirib.

Görüşdə 40 minə yaxın “Traktor” tərəfdarı tamaşaçı qismində iştirak edib. Soydaşlarımız oyun boyu “Azərbaycan var olsun – İstəməyən kor olsun”, “Azərbaycan qızları, göylərin ulduzları”, “Yaşa Azərbaycan” kimi şüarlar səsləndiriblər.

Qeyd edək ki, İranda qadınların futbol stadionlarında oyun izləməsi qadağan edilib.