Yazıçı ABŞ prezidenti olmaq istəyir – Seçilsə, ölkəni “sevgi siyasəti” ilə idarə edəcək

Amerikalı yazıçı Marianna Uilyamson 2024-cü ildə keçiriləcək prezident seçkilərində iştirak edəcəyini açıqlayıb.

Teleqraf.com xəbər verir ki, yazıçı seçkilərdə Demokratlar Partiyasından namizəd olacağı xəbərini təsdiqləyib.

Ölkəsinin öz şəxsi maraqlarını güdən oliqarxların, şirkətlərin və silah istehsalçılarının kölgəsi altında avtoritarizm təhlükəsi ilə üzləşdiyini deyən Uilyamson konqresmenlərin onlarla adekvat mübarizə aparmadıqlarını da bildirib.

“Kölgə effekti”, “Sevgiyə qayıdış”, “Dəyişiklik”, “Möcüzələr ili” kimi çox oxunan kitabların müəllifi olan Marianna Uilyamson 2020-ci il prezident seçkilərində də namizəd olub. “Sevgi siyasəti” yürütdüyünü söyləyən Uilyamson seçki kampaniyası zamanı ianələrlə bağlı problemlər yarandığı və kifayət qədər dəstək ala bilmədiyi üçün seçki öncəsi yarışdan geri çəkilib.

Yazıçının martın 4-də namizədliyini rəsmən elan edəcəyi gözlənilir.

Hələlik Demokrat Partiyasından namizədliyini rəsmən elan edən bir isim yoxdur. Demokrat Prezident Co Bayden isə seçkilərdə iştirak etmək niyyətində olduğunu bildirib, amma hələlik rəsmi açıqlama verməyib.