Aİ Gürcüstan QHT-ləri və mediasına 8,5 milyon avro ayırdı

Avropa Komissiyası Gürcüstanda vətəndaş cəmiyyəti və müstəqil KİV-ə dəstəyini davam etdirir və bu məqsədlə artıq 8,5 milyon avro ayrılıb.

Teleqraf.com xəbər verir ki, bu barədə avrokomissar Marta Kos bildirib.

O, kommunikasiya tədbirləri üçün əlavə olaraq 7 milyon avronun ayrılmasına da hazırlıq ifadə edib.

“Biz “Gürcü Arzusu” hakimiyyətinin yaydığı dezinformasiyaya cavabımızı gücləndirməliyik”, - o deyib.

Avrokomissar xatırladıb ki, Gürcüstan hökuməti üçün nəzərdə tutulmuş 100 milyon avrodan çox maliyyələşdirilmə dayandırılıb.

M.Kos həmçinin qeyd edib ki, Aİ-yə üzv dövlətlər Gürcüstanın diplomatik pasport sahibləri üçün vizasız rejimin məhdudlaşdırılması ilə bağlı qərarı yanvarın sonunda qəbul edəcəklər.

Qeyd edək ki, Gürcüstan hökuməti Aİ-nin Gürcüstana ayıracağı vəsaitlərin təyinatının dəyişdirilməsinə qarşıdır. Baş nazir İrakli Kobaxidze bu barədə qərarı növbəti anti-Gürcüstan addımı hesab edir. Onun sözlərinə görə, həmin vəsaitlər gürcü xalqına və onun iradəsinə qarşı çıxan qüvvələr üçün sərf ediləcək.