“Həm Türkiyə, həm də Ermənistanla...” – Rusiyadan açıqlama

“Ermənistan və Türkiyə arasında normal qonşuluq münasibətlərinin bərpasından bütün dünya faydalanacaq”.

Teleqraf.com xəbər verir ki, bunu Rusiyanın BMT-dəki (BMT) daimi nümayəndəsinin müavini Dmitri Polyanski deyib.

Türkiyə-Ermənistan münasibətlərinin normallaşması ilə bağlı Moskvada keçirilməsi planlaşdırılan danışıqlarla bağlı açıqlama verən Polyanski bunu alqışladıqlarını və dəstəklədiklərini bildirib.

“Biz yaxın regional əməkdaşlığın tərəfdarıyıq və Türkiyə-Ermənistan münasibətlərinin normallaşmasını alqışlayırıq. Görüşün Moskvada keçirilməsi təəccüblü deyil, həm Türkiyə, həm də Ermənistanla yaxşı tərəfdaşlığımız var”, - diplomat söyləyib.

Polyanski bunun çox həssas proses olduğunu və tərəflər arasında etimadın olmadığını, şübhənin olduğunu bildirib:

“Buna görə də bunun öhdəsindən gəlmək lazımdır, əgər bacarsaq, bütün dünya Ermənistanla Türkiyə arasındakı normal qonşuluq münasibətlərindən faydalanacaq. Hazırda bundan kifayət qədər uzağıq. Addım-addım irəliləyək və iki ölkənin yaxınlaşmasını təşviq edək”.