Robert Köçəryanın oğlu saxlanıldı - Levon polis əməkdaşlarına tabe olmadı

Ermənistanın ikinci prezidenti Robert Köçəryanın oğlu İrəvanda saxlanılıb.

Teleqraf.com xəbər verir ki, İrəvandakı Baqramyan prospektində polis xüsusi təyinatlıları Levon Köçəryanı etiraz aksiyasında iştirak edərkən saxlayıblar.

Levon Köçəryan saxlanılarkən yürüş iştirakçılarına “mübarizə davam edir” deyib.

Qeyd edək ki, bu gün səhər saatlarından İrəvanda 70 nəfər saxlanılıb.

Polisin mətbuat xidməti izah edib ki, həbslər Ermənistan İnzibati Xətalar Məcəlləsinin 182-ci maddəsi əsasında – polis əməkdaşlarının qanuni tələblərinə tabe olmamaqda şübhəli bilinərək həyata keçirilib.

Ermənistan müxalifəti mayın 1-də ertəsi gündən etibarən “genişmiqyaslı vətəndaş itaətsizliyi aksiyalarına” başlayacağını elan edib. Etirazçıların əsas tələbi ölkənin baş naziri Nikol Paşinyanın istefasıdır.