14 İyul 2016 19:49
485
12 Punto 14 Punto 16 Punto 18 Punto

Azərbaycan Parlamentinin sədri Oqtay Əsədov ölkəmizdə səfərdə olan Ukrayna Prezidenti Petro Poroşenkonun başçılıq etdiyi nümayəndə heyəti ilə görüşüb.

Teleqraf.com Milli Məclisin mətbuat xidmətinə istinadən məlumat verir ki, O.Əsədov xalqlarımız arasındakı dostluq əlaqələrinin qədim tarixi köklərə söykəndiyini söylədi. Bildirdi ki, ölkələrimiz müstəqillik əldə etdikdən sonra münasibətlərimiz keyfiyyətcə yeni səviyyəyə yüksəlib. Ukrayna nümayəndə heyətinin ölkəmizə budəfəki səfəri əlaqələrimizin daha da inkişafına yeni impuls verəcək. Azərbaycan və Ukrayna prezidentlərinin görüşündə aparılan danışıqlar və müzakirə olunan məsələlər münasibətlərimizin daha da dərinləşməsinə xidmət edəcək.

Spiker iqtisadi sahədə əməkdaşlıq üçün geniş imkanlar olduğunu vurğuladı: "Ötən illə müqayisədə tiçari münasibətlərimizdə 20 faizdən çox artım müşahidə olunur. İnanırıq ki, gələcəkdə bu göstərici daha da artacaq".

Milli Məclisin sədri dövlətlərarası münasibətlər sistemində parlamentlərin mühüm rol oynadığına diqqət çəkərək hər iki ölkənin qanunvericilik orqanlarında dostluq qruplarının fəaliyyət göstərməsini təqdirəlayiq hesab etdi. Bildirdi ki, deputatların qarşılıqlı səfərləri və beynəlxalq təşkilatlarda onları düşündürən məsələlər ətrafında müzakirələr aparılması təcrübə və informasiya mübadiləsi baxımından çox önəmlidir.

O.Əsədov regional münaqişələrin inkişafa mane olduğunu söyləyərək Azərbaycanın bütün ölkələrin ərazi bütövlüyünün qorunması barədə mövqeyinin dəyişməz olduğunu vurğuladı.

Səmimi qəbul üçün minnətdarlığını bildirən Ukrayna Prezidenti P.Poroşenko ölkəmizə səfərindən və burada keçirdiyi görüşlərdən razı qaldığını söylədi. O, Prezident kimi ölkəmizə ilk dəfə səfər etdiyini, ölkəsinin Azərbaycanla bütün sahələrdə əlaqələrin inkişafında maraqlı olduğunu bildirdi. Qeyd edildi ki, nəqliyyat, neft və qaz daşınmaları, kənd təsərrüfatı, mədəniyyət və digər sahələrdə əməkdaşlığı genişləndirmək üçün yaxşı imkanlar var. Birgə layihələrin həyata keçirilməsi də hər iki xalqın mənafelərinə xidmət edir.

Söhbətdə tərəfləri maraqlandıran məsələlər ətrafında geniş fikir mübadiləsi aparıldı.

Görüşdə Milli Məclis sədrinin birinci müavini Ziyafət Əsgərov, parlament Aparatının rəhbəri Səfa Mirzəyev, Ukrayna ilə parlamentlərarası əlaqələr üzrə işçi qrupunun başçısı Rüfət Quliyev, Ukraynanın ölkəmizdəki səfiri Aleksandr Misşenko və digər rəsmi şəxslər iştirak ediblər.


Müəllif: