“Qarabağ”ın sözçüsü: “Mümkün deyil...”

Prezident İlham Əliyev “Qarabağ” futbol klubunun oyunçularını təbrik edərək, bu qələbəyə öncədən inandığını bildirdi. O, nitqi zamanı “Qarabağ”a hər zaman güvəndiyini söylədi və bildirdi ki, bu qələbə bütün Azərbaycan xalqının qələbəsidir.

Bu sözləri Teleqraf.com-a açıqlaması zamanı “Qarabağ” futbol klubunun mətbuat katibi Nurlan İbrahimov deyib. O bu qalibiyyətin ölkəmiz üçün yeni dönəm olacağını söyləyib:

“Bu qələbənin Azərbaycan futbolu üçün əhəmiyyətini ifadə etmək mümkün deyil. Biz böyük klublarla oynamaqda başqa, o ab-havanı, belə demək mümkünsə, uşaqlıqdan alışdığımız yüksək səviyyəli liqa ab-havasını hiss edəcəyik. Nəticələrdən asılı olmayaraq, ölkəmiz üçün bu, yeni çağırışdır. Bu, sadəcə, futbol üçün deyil, mədəni və siyasi sahələr üçün də önəm kəsb edir.

Ən vacib amil isə budur ki, bütün ölkə “Qarabağ”ı özünküləşdirdi. Bizi daha da doğma hiss etdi. Bu qələbəni hər kəs özünün qələbəsi kimi bayram elədi. Hamı səmimi inam hissini yaşadı. Doğrudan da bu belədir. Bu, bütün Azərbaycanın qələbəsidir, 11 nəfərdən ibarət futbol komandasının yox!”