Lütfi Zadə ana torpağa tapşırıldı

29 Sentyabr 2017 14:03

1 819

2017.09.29 02:17

Bu gün dünya şöhrətli azərbaycanlı alim, professor Lütfi Zadənin cənazəsi Azərbaycana gətirilib.

Teleqraf.com xəbər verir ki, cənazəni Heydər Əliyev adına beynəlxalq hava limanında tanınmış akademiklər Rasim Əliquliyev, Telman Əliyev, AMEA-nın müxbir üzvü Misir Mərdanov, AMEA Rəyasət Heyəti aparatının İşlər İdarəsinin müdiri Fətəli Abdullayev və digər ziyalılar qarşılayıb.

Qeyd edək ki, Lütfi Zadənin nəşi sentyabrı 26-da ABŞ-dan yola salınmışdı.

Cənazə Heydər Məscidinə aparılacaq və cənazə namazı qılınacaq.

Azərbaycan Milli Elmlər Akademiyasında (AMEA) olacaq. Mərasim saat 12.00-dan 14.00-dək davam edəcək.

Lütfi Zadənin I Fəxri Xiyabanda dəfn olunacağı gözlənilir.

***

10:26

Dünya şöhrətli azərbaycanlı alim, Kaliforniya Universitetinin professoru Lütfi Zadənin nəşi yuyulmaq üçün Heydər Məscidinə gətirilib. Ona cənazə namazı qılınıb.

***

10:46

Dünya şöhrətli azərbaycanlı alim, Kaliforniya Universitetinin professoru Lütfi Zadə ilə vida mərasimi başlayır.

Onun cənazəsi "Heydər" məscidindən AMEA-nın Əsas binasına gətirilib.

Mərasimdə dövlət və hökumət rəsmiləri, elm və mədəniyyət xadimləri, ziyalılar, ictimaiyyət nümayəndələri və mərhumun yaxınları iştirak edəcək.

Mərhum I Fəxri xiyabanda dəfn olunacaq.

***

Lütfi Zadənin əldə etdiyi naliyyətlər praktiki baxımından dünya elminə böyük səmərə verib.

Teleqraf.com xəbər verir ki, bunu Azərbaycan Milli Elmlər Akademiyasının prezidenti Akif Əlizadə Lütfi Zadənin vida mərasimində deyib.

Onun sözlərinə görə, Lütfi Zadə ömrünü Amerikada keçirsə də, doğma vətəni yaddan çıxarmayıb: "Azərbaycanın uğurları onu sevindirirdi. O, ilk dəfə 1965-ci ildə Azərbaycana gəlmişdi. Son dəfə isə 2008-ci ildə Azərbaycan dövlətinin xahişi ilə Bakıda səfərdə oldu. AMEA böyük alimlə görüş keçirdi və o, geniş mühazirə ilə çıxış etdi".

Akif Əkizadə qeyd edib ki, Lütfi Zadə Azərbaycanın "Dostluq" Ordeni, eləcə də Nizamı Gəncəvi adına qızıl medalla təltif edilib.

***

13:41

Dünya şöhrətli azərbaycanlı alim Lütfi Zadə ilə vida mərasimi başa çatıb.

Teleqraf.com-un məlumatına görə, mərhum I Fəxri xiyabanda dəfn olunacaq.

***

Dünya şöhrətli azərbaycanlı alim Lütfi Zadə I Fəxri xiyabanda torpağa tapşırıldı.

Qeyd edək ki, dünya şöhrətli alim Lütfi Zadə sentyabrın 5-da 96 yaşında Kaliforniyada vəfat edib.

Lütfi Zadə 1921-ci il fevralın 4-də Bakıda, Rəhim Ələsgərzadə (1895-1980) və yəhudi əsilli rus uşaq həkimi olan Feyqa (Fanya) Moiseyevna Koremanın (1897-1974) ailəsində dünyaya gəlib.

Daha sonra ABŞ-a köçüb.

Lütfi Zadə süni intellekt sahəsində qeyri-səlis məntiq nəzəriyyəsinin banisi, Kaliforniya Berkli Universitetinin professoru idi. O, bu ali təhsil müəssisəsinin ömürlük professoru seçilmiş yeganə şəxsdir. Amerikadakı Azərbaycan diaspor təşkilatlarının fəxri sədri idi.

Müəllif: İlhamə Əbülfət