“Kiminsə biznes maraqlarına toxunmuşuq” - DİM sədri

Bu il keçirilən imtahanlar zamanı başqalarının əvəzinə imtahana gələn şəxslər tutulub. Həmin məlumatlar bu gün açıqlanıb.

Bu sözləri Teleqraf.com-a Dövlət İmtahan Mərkəzinin (DİM) Direktorlar Şurasının sədri Məleykə Abbaszadə bu gün keçirdiyi mətbuat konfransında deyib.

O bildirib ki, imtahan prosesində bu barədə açıqlama verilməyib, Baş Prokurorluğa isə məlumat çatdırılıb: “Biz bu şəxsləri tutmaqla kiminsə biznes maraqlarına toxunmuşuq”.

Daha sonra Məleykə Abbaszadə deyib ki, ödənişsiz və dövlət sifarişli yer seçən abituriyentlər arasında ali məktəbə qəbul ola bilməyənlər var.

Onun sözlərinə görə, buna səbəb həmin abituriyentlərin yalnız bir neçə və keçid balı yüksək olan ixtisas seçmələridir: “Birinci ixtisas qrupunda 540 baldan yüksək toplayan heç bir abituriyent kənarda qalmayıb. 530-539 bal arasında nəticə göstərsə də ali məktəbə qəbul olmayan 1 abituriyent olub. 520-530 bal aparında nəticə gösətərən bir abituriyent ali məktəbə qəbul olmayıb. Birinci qrupda 500-dən yuxarı nəticə göstərib, ixtisas seçimi edən yalnız iki abituriyent ali məktəbə qəbul olmayıb.

İkinci ixtisas qrupunda 490-dan yuxarı bal toplayan və ixtsas seçimi edən hər bir abituriyent ali məktəbə qəbul olub. 28 nəfər 400 baldan çox toplasa da, ali məktəbə qəbul olmayıb. Onların da ikinci mərhələdə iştirak imkanı var.

Üçüncü qrupda 500-540 arasında bal toplayan 21 nəfər ali məktəbə qəbul olmayıb.

Dördüncü ixtisas qrupu üzrə müsabiqə vəziyyəti yüksək olub. Ona görə də 610 baldan yüksək nəticə göstərən hər kəs ali məktəbə qəbul olub. 600-610 bal toplayan 6 nəfər ali məktəbə qəbul olmayıb, çünki onlar cəmi 2 ixtisas seçiblər.

500-dən yuxarı bal toplayıb ali məktəbə qəbul olmayan cəmi 44 nəfərdir”.