Koronaya qarşı alman tədbirləri: Öskürən dərhal karantinə alınacaq...

Almaniya koronavirus epidemiyasına qarşı mübarizə məqsədilə qismən karantin tədbirlərinin sərtləşdirməyə hazırlaşır.

Teleqraf.com xəbər verir ki, bu barədə yerli mətbuat mətlumat yayıb.

Bildirilir ki, Almaniya kansleri Angela Merkel noyabrın 23-də əyalət baş nazirləri ilə koronavirus epidemiyasına qarşı mübarizədə tətbiq olunan karantin tədbirlərinin təsirlərini müzakirə edəcək.

Müxtəlif media qurumlarının əlindəki qərar layihəsinə görə, məktəblər açıq qalacaq, ancaq özəl toplantıların minimuma enəcəyi nəzərdə tutulur. Federal hökumətin məhdudlaşdırma planlarına görə, kütləvi yığıncaqlarda ən çox bir ailədən iki nəfərinin iştirakına icazə veriləcək. Ailə içində tədbirlərin milad tətilinə qədər ləğv edilməsi istənilir.

Bundan əlavə, öskürək və qrip kimi əlamətlər göstərənlərin dərhal karantinə alınması tövsiyələr arasındadır.

Hazırda Almaniyada iki ailənin 10 nəfərədək üzvünün çöldə görüşməsinə icazə verilir.

Alman hökuməti gənclərin çöldə ən çox bir dostu ilə görüşməsinə icazə verilməsini istəyir. Digər tərəfdən, məktəblərdə maska ​​məcburiyyətinin genişləndirilməsi planlaşdırılır. Buna görə şagirdlərin və müəllimlərin məktəbin həyətində və sinifdə maska ​​taxmaları gözlənilir. Məktəblərdə siniflər çox kiçik olduğu təqdirdə şagirdlərin iki hissəyə bölünməsi planlaşdırılır.