5 Oktyabr 12:18
4 178
12 Punto 14 Punto 16 Punto 18 Punto

ABŞ Rusiyanın tərəfdaşları ilə “izahat” işini davam etdirir. Məsələn, ABŞ Ermənistanı Rusiyadan uzaqlaşdırmaq üçün tez-tez erməni rəsmilərini Vaşinqtona dəvət edir, onlarla görüşlər və müzakirələr keçirir.

Teleqraf.com xəbər verir ki, bu barədə “Atlas” Araşdırmalar Mərkəzinin analitik təhlilində deyilir.

Mərkəzin ekspertlərinin fikrincə, Vaşinqtonun Pekinlə də münasibətləri soyuqdur, Tayvan problemi gərginliyi daha da artırır:

“Bu baxımdan, Vaşinqtonun Çin siyasətində uğuru yoxdur.

Vaşinqton Rusiyanın daha bir tərəfdaşı – Hindistanla da fəal dialoq aparır. Hindistan xarici işlər naziri Subramanyam Cayşankar Vaşintonda ABŞ prezidentinin milli təhlükəsizlik məsələləri üzrə müşaviri Ceyk Sallivanla görüşdə ikitərəfli əməkdaşlığın inkişafı yollarını müzakirə edib. Sallivan Hindistan xarici işlər nazirinin inandırmağa çalışıb ki, Dehlinin hərbi və təhlükəsizlik sahəsində Rusiya ilə əməkdaşlığı məqsəduyğun deyil.

Amerikalı rəsmilər Hindistanın Rusiya ilə münasibətlərdə məsafə saxlamasının zərurətini vurğulayırlar. Ancaq Vaşinqtonda onu da anlayırlar ki, Hindistan-Rusiya münasibətləri onilliklərdir formalaşıb, Dehlinin siyasətinə təsir etmək üçün müəyyən zamana ehtiyac var. Yəni Dehli Vaşinqtonun istəyi ilə Kremllə əməkdaşlıqdan qısa müddətdə imtina etməyəcək.

ABŞ dövlət katibi Entoni Blinken də hindli həmkarını Rusiyadan uzaq dayanmağa inandırmağa çalışıb. Vaşinqton Ukraynada işğalçı müharibə fonunda Rusiyanı təcrid etməyə çalışarkən Dehlinin Rusiyadan silah və hərbi texnika almasının qarşını almağa çalışır.

Vaşinqtonun səylərinə baxmayaraq, Dehli Rusiya ilə əməkdaşlıqdan imtina etməyəcək. Hindistan Rusiya ilə birgə Şanxay Əməkdaşlıq Təşkilatı və BRİKS-in üzvüdür. Ancaq Dehlinin Rusiyadan aldığı hərbi texnikanın həcmi azalıb. Rusiya hərbi texnikasının keyfiyyəti Dehlidə suallar doğrumağa başlayıb. Buna görə də Dehli son illər Qərb ölkələrinin hərbi texnikasına üstünlük verməyə başlayıb”.

Məqalədə o da qeyd edilir ki, ABŞ Hindistan vətəndaşlarına viza verilməsini azaldıb:

“Vaşinqton bunu koronavirusla əlaqələndirsə də, bu məsələdə siyasi təzyiq elementi görünür. Hindistanın informasiya texnologiayaları sahəsində mütəxəssislərinin, proqramçıların ABŞ-da çalışmaq istəyi müxtəlif problemlərlə üzləşib. Halbuki ABŞ-ın hindli proqramçılara ehtiyacı var”.


Müəllif: Mənsur Rəğbətoğlu