Xankəndidə qarşıdurma başladı – “Araiki bizdən əvvəl onlar bitirəcəklər”

“Qarabağ separatçılarının lideri Araik Arutyunyanın sonu necə olacaq? Bu sual ona görə aktualdır ki, son günlər Xankəndidə qarşıdurmaların və atışmaların sayı artıb”.

Teleqraf.com xəbər verir ki, bunu politoloq Elxan Şahinoğlu deyib.

Onun sözlərinə görıə, Arutyunyan İkinci Qarabağ Müharibəsinə qədər işğal altındakı bölgəni Ermənistan Baş naziri Nikol Paşinyanla birgə istədiyi kimi idarə edirdi:

“Azərbaycan ordusu müharibə günlərində Arutyunyanın yerini müəyyənləşdirməyə çalışdı, o, məhv edilməliydi. Çünki Arutyunyan Gəncə və digər şəhərlərimizin bombalanması əmrini verdiyini açıq formada dilə gətirmişdi. Həmin zərbələr nəticəsində onlarla mülki vətəndaşımızı itirdik. Arutyunyan müharibədən sağ çıxdı. “İstefa” verib aradan çıxmağa çalışsa da, Moskvadan icazə vermədilər.

Müharibədən sonra Arutyunyan artıq Moskvanın nəzarətinə keçmişdi. İndi də “istefa” vermək istəyir, ancaq Moskvadan hələ razılıq almayıb. Razılıq alan kimi Rusiya hərbi kontingentinə aid helikopterlərin biri ilə bölgədən qaçmağa çalışacaq.

Arutyunyan “vəzifə”sinin icrasına davam edərsə, bu, separatçıların və bölgənin erməni sakinlərinin durumunu daha da ağırlaşdıracaq. Çünki Arutyunyan Azərbaycan hökumətin təmsilçiləri ilə görüşə neqativ yanaşır. Üçüncü qüvvənin iştirakıyla neytral zonada dialoqun mümkünlüyünü bildirib. Buna isə rəsmi Bakı razılaşmayacaq. Bu gedişat Qarabağdakı ermənilərin sosial problemlərini dərinləşdirəcək. Qazları, elektrkləri, internetləri kəsiləcək, çünki bunların hamısı işğal dönəmində qanunsuz çəkilib. Qarabağ erməniləri Azərbaycan qanunlarına tabe olmayana qədər işğal dövründəki rahat həyatlarına qayıda bilməyəcəklər”.

Elxan Şahinoğlu hesab edir ki, bu durumda Qarabağ erməniləri və əli silahlı separatçıların bir qismi Arutyunyanı hədəf götürəcəklər:

“Nə qədər ki separatçılar torpaqlarımızı işğal altında saxlayıb, ərazilərimizin nemətlərindən istifadə edirdilər, fikir birliyi içində idilər, elə ki müharibədə məğlub oldular və Laçın yolunda sərhəd keçid məntəqəsi yaradıldı, aralarında ixtilaf dərinləşdi və günahkar axtarışına çıxdılar. Bu durum separatçıların öz aralarında silahlı qarşıdurmaya gətirəcək. Arutyunyanı bizdən əvvəl elə özləri bitirəcəklər”.