Həbib daha bir döyüş keçirməlidir - öhdəlik

Qarışıq döyüş növləri (MMA) üzrə ən güclü idmançılardan olan Həbib Nurməhəmmədov Müstəqil Döyüş Çempionatı (UFC) ilə bağladığı müqaviləyə görə daha bir döyüş keçirməlidir.

Teleqraf.com xəbər verir ki, rusiyalı idmançının meneceri Əli Əbdül-Əziz müsahibəsində UFC ilə imzalanmış müqaviləyə görə Həbib Nurməhəmmədovun daha bir döyüş keçirməli olduğunu bildirib.

Qeyd edək ki, oktyabrın 6-da ABŞ-da keçirilən UFC 229 turnirində Həbib Nurməhəmmədov və Konor Makqreqor arasında döyüş keçirilib. Rusiyalı idmançı irlandiyalı rəqibini məğlub edərək yüngül çəkidə çempionluq titulunu qoruyub. Döyüşün başa çatmasından sonra həm döyüşçülər, həm də komandalarının nümayəndələri, o cümlədən rusiyalı qaydasız döyüş ustası Zübeyr Tuhuqovun iştirakı ilə atışma olub. Nəticədə UFC 229 turnirində baş verən hadisəyə görə Tuhuqovla İrlandiya təmsilçisi Artyom Lobov arasındakı qarşılaşma ləğv edilib.

Döyüşdən sonra Nevada Dövlət Atletika Komissiyası (NSAC) Nurməhəmmədova ödənilməli olan iki milyon dollar qonorarın verilməsini istintaqın bitməsinə qədər dondurub.

Bundan sonra Həbib Nurməhəmmədov bildirib ki, onun komandasının üzərindən ittihamlar götürülməyənə qədər UFC ilə yeni döyüşlə bağlı danışıqlar aparmayacaq.