Velosipedçisimiz "Tour of China"da yaxşı nəticə göstərib

Çində Beynəlxalq Velosipedçilər İttifaqının 2.1 kateqoriyalı “Tour of China” veloyürüşünün 2-ci bölümünün 4-cü mərhələsi də arxada qalıb. 5 mərhələdən ibarət bu hissədə iştirakçılar güclü yağış altında 138.8 km məsafə qət ediblər.

Azərbaycan Velosiped İdmanı Federasiyasından Teleqraf.com-a verilən məlumata görə, bu mərhələdə “Synergy Baku” komandasının üzvlərindən ən yaxşı nəticə Maykl Şvayzerə məxsus olub - o, məsafəni 2 saat, 53 dəqiqə, 16 saniyəyə başa vurmaqla mərhələ qalibi ilə eyni nəticə göstərib və fotofinişə əsasən 8-ci olub.

Ümumi təsnifata gəlincə, təmsilçilərimizdən Aleksandr Surutkoviç və Metyu Bremmier müvafiq olaraq 12-13-cü yerlərdə qərarlaşırlar. İlk 20-likdə daha bir təmsilçimiz - bir neçə gündən sonra İspaniyada keçiriləcək dünya çempionatında Azərbaycanı təmsil edəcək Elit yığma komandamızın üzvü Elçin Əsədov da var – o, 16-cı pillədədir.

Sabah keçiriləcək sonuncu, 5-ci mərhələdə isə iştirakçılar 109.2 km məsafə qət edəcəklər.

Qeyd edək ki, şüarı "Davamlı gələcəyə doğru" olan "Synergy Group" ASC Azərbaycanın ilk peşəkar velosiped komandası "Synergy Baku Cycling Project"in baş sponsorudur.