“Erməni tərəfi danışıqlara daha çox meyl edir” - Professor

2019-cu ildə ikinci dəfə Amerikada Azərbaycan və Ermənistan xarici işlər nazirləri arasında görüş keçirilir. Mənim qənaətim belədir ki, Ermənistanı danışıqlar masasına Amerika oturdur.

Bu sözləri Teleqraf.com-a hüquq elmləri doktoru, professor Rüstəm Məmmədov Nyu-Yorkda Azərbaycanın xarici işlər naziri Elmar Məmmədyarovla Ermənistan xarici işlər naziri Zohrab Mnatsakanyan arasında baş tutan görüş haqqında danışarkən deyib.

Politoloq bildirib ki, Nyu-York görüşünü başqa cür qiymətləndirmək mümkün deyil: “İndiki mərhələdə danışıqlar prosesində ABŞ aktivlik nümayiş etdirir. Onun məqsədi regionda maraqlarını təmin etmək, müharibə riskinin qarşısını almaq ola bilər. Aydındır ki, danışıqlarda Rusiya və ABŞ-ın hər birinin öz maraqlarını güdür”.

Rüstəm Məmmdov xatırladıb ki, nazirlər arasında görüş keçirilsə də, hansı məsələlərin müzakirə edildiyi, hansı razılaşmaların əldə olunduğuna dair informasiya yoxdur: “Əslində danışıqlar uzun illərdir gedir, amma nəticə yoxdur. Erməni tərəfi danışıqların aparılmasında və sülhün əldə edilməsində maraqlı deyil. Mənim fikrimcə, müharibə ideyası genişləndikcə erməni tərəfi danışıqlara daha çox meyl edəcək”.