Serbiya niyə Ermənistana silah göndərdi? – İlginc məqamlar

“Serbiyadan Ermənistana minomyotlar və müxtəlif kalibrli hərbi sursat da daxil olmaqla böyük həcimdə silah sursatın göndərildiyi artıq təsdiqlənmiş faktdır. Azərbaycan Xarici İşlər Nazirinin müavini Xələf Xələfov da bunu Serbiyanın müvəqqəti işlər vəkili Danitsa Veinoviçin diqqətinə çatdırıb. Bir sözlə, Serbiyanın Ermənistana silah-sursat göndərib-göndərməməsi, artıq müzakirə mövzusu deyil. Göndərib. Amma nə üçün? Buna səbəb nədir? Necə olur ki, Azərbaycanın “strateji tərəfdaşı” sayılan və iqtisadiyyat, təhsil, səhiyə də daxil olmaqla müdafiə sənayesinədək bütün istiqamətlər üzrə yaxından əməkdaşlıq etdiyimiz bir ölkə işğalçı Ermənistana silah-sursat göndərir”.

Teleqraf.com xəbər verir ki, bu sözləri politoloq Elçin Mirzəbəyli deyib.

Ekspert bildirib ki, Azərbaycanın Serbiyaya göstərdiyi son humanitar yardımı, ayrı-ayrı şirkətlərin qarşıslıqlı iqtisadi əməkdaşlıq münasisibətləri çərçivəsindəki yatırımlarını bir kənara qoysaq, təkcə 2013-cü ildə bu xəyanətkar ölkənin bir layihəsinə - Liq-Prelin avtomagistralının “Koridor -11” sahəsinin inşasına 308 milyon avroluq kredit ayırmışıq:

“Həm də 25 il müddətinə, cəmi 4 faizlə. Nə üçün? Axı qütblər arasında manipulyasiya etməklə mövcudluğunu qoruyub saxlamağa çalışan, Avropa İttifaqının qapısında növbə gözlədikləri halda Avrasiya İqtisadi İttifaqı (Aİİ) ilə azad ticarət haqqında müqavilə imzalayan Serbiya bir dövlət olaraq bizim üçün nə qədər böyük əhəmiyyət daşıya bilər? Elə Ermənistana göndərilən silah-sursatının izinin axtarışına da 2019-cu ilin noyabr ayının 10-dan, Aİİ-nin Avrasiya İqtisadi Komissiyasının sədri Tiqran Sərkisyanla Serbiya hökumətinin sədri Ana Brnabiç arasında imzalanan müqavilədən başlamaq lazımdır.

Tiqran Sərkisyanın isə kim olduğunu, güman edirəm hər kəs bilir. 1998-2008-ci illərdə Ermənsitan Mərkəzi Bankının sədri, 2008-2014-cü illərdə Ermənistanın Baş naziri, 2014-2016-cı illərdə isə Ermənistanın ABŞ-dakı səfiri. Səfir kimi ABŞ-dakı səlahiyyət müddəti başa çatdıqdan sonra Tiqran Sərkisyan dərhal Avrasiya İqtisadi İttifaqının ən əsas strukturunun - Avrasiya İqtisadi Komissiyasının sədri təyin olunub və 2016-cı il fevralın 1-dən 2020-ci il fevralın 1-dək komissiyaya rəhbərlik edib. Serbiya ilə azad ticarət haqqında müqavilənin imzalanması qədər olan prosesdə də Aİİ-ni həmin bu Tiqran Sarkisyan təmsil edib.

Zənnimcə mənzərə aydındır. Bu ipucu prosesin bütün detallarına aydınlıq gətirilməsi üçün yetərlidir”.