İbrahim Kalın Robert O’Brayınla Qarabağı müzakirə etdi

Türkiyə Prezident Adminstrasiyasının sözçüsü İbrahim Kalınla ABŞ-ın Milli Təhlükəsizlik üzrə məsləhətçisi, səfir Robert O’Brayın arasında telefon danışığı olub.

Teleqraf.com xəbər verir ki, telefon söhbətində Dağlıq Qarabağ münaqişəsi də daxil olmaqla Suriya və regional məsələlər, təhlükəsizlik üzrə əməkdaşlıq, ikitərəfli əlaqələrlə bağlı müzakirələr aparılıb.

Söhbət əsnasında Qarabağ probleminin diplomatik yolla həllinin araşdırılmasının əhəmiyyəti, Ermənistan tərəfinin atəşkəsi pozması və mülki əhalini hədəf alan hücumlarının beynəlxalq hüquqa zidd olduğu vurğulanıb.

Davamlı və qalıcı sülhün bərqərar olması üçün Ermənistanın işğal etdiyi Dağlıq Qarabağ və ətraf ərazilərindən tamamilə çəkilməsi bir daha bildirilib.

Azərbaycanın ərazi bütünlüyünün bərpası istiqamətində beynəlxalq təşkilatların - BMT Təhlükəsizlik Şurasının və ATƏT-in qərarları çərçivəsində faktiki addımların atılmasının vacibliyi qeyd olunub.