"Separatçıların təxribatları davam etsə, "Dəmir yumruq" yenidən..." - Açıqlama

Son günlər Qarabağda separatçıların təxribatları daha da artmaqdadır. Gah qondarma "işğal haqqında qanun"u olmayan parlamentin müzakirəsinə çıxarır, gah təlim keçirir, gah da öz aləmlərində əhalini baş verə biləcək təxribatlardan qorumağa çalışdıqları görüntüsünü yaratmaq istəyirlər. Burada haqlı olaraq bir neçə sual yaranır. Bu təlimlər kimə qarşı keçirilir? Məqsəd nədir? Separatçılar yenidən müharibəyə hazırlaşırlarmı? 44 günlük müharibə onlara yaxşı düşünmək üçün yetərli olmadımı? Heç şübhəsiz ki, guya hansısa təhlükənin olması və əhalinin buna hazırlanması yalnız və yalnız avantüradır və erməni propaqandasına xidmət edir.

Bunu Teleqraf.com-a Milli Məclisin deputatı Ceyhun Məmmədov deyib.

O qeyd edib ki, Azərbaycan dəfələrlə bu barədə mövqeyini ifadə edib: “Azərbaycan bölgəyə sülhün gəlməsini, yekun sülh müqaviləsinin imzalanmasını, bölgə xalqlarının birgə sülh və əmin-amanlıq şəraitində yaşamasını istəyir. Əgər separatçılar 44 gündə başlarına gələnlərdən nəticə çıxarmayıb müharibə istəyirlərsə, Azərbaycan buna hər an hazırdır. Ermənilər bu təxribatların hansı nəticələrə gətirə biləcəyini yaxşı bilirlər. 44 günlük müharibədə Azərbaycan bunu Ermənistana göstərdi. Bu yaraların sağalması üçün illər lazımdır. Dəfələrlə Prezident İlham Əliyev separatçılara xatırladıb ki, Dəmir yumruq yerindədir. Ermənilər bunu unutmamalıdırlar. Belə davam etsə, Dəmir yumruq yenidən işə düşəcək”.

Millət vəkilinə görə, cəmiyyətdə haqlı narazılıq yaradan və düşündürən digər bir sual isə odur ki, bəs rus sülhməramlıları hara baxır, niyə belə təxribatlara göz yumurlar, ciddi ölçü götürülmür? Başları yoxsa humanitar aksiyalara qarışıb?:

“Onların əsas vəzifəsi belə halların baş verməsinin qarşısını almaqdır. Bölgəyə də bu məqsədlə gəliblər. Əgər onlar bu təxribatların qarşısını almaqda acizdirlərsə, Azərbaycan özü təxribatçıları cəzalandırmaq üçün geniş imkanlara malikdir. Bunun üçün əlimizdə kifayət qədər imkan və əsaslar var”.

Ceyhun Məmmədov hesab edir ki, separatçılar bu təxribatlara mütləq son qoymalıdır: “Sülhməramlılar da belə halların qarşısını qətiyyətlə almalıdır. Əks halda məsuliyyəti ermənilər daşıyır. Azərbaycanın öz ərazilərində anti-terror əməliyyatları keçirmək hüququ var”.