"Rabitələrin açılması Ermənistanın Rusiyadan asılılığını azaldacaq" - Ceyms Uorlik

"Kommunikasiyaların açılması Ermənistanın Rusiyadan asılılığını azaldacaq, bu, Azərbaycana da sərfəli olacaq".

Teleqraf.com xəbər verir ki, bunu ATƏT-in Minsk qrupunun keçmiş amerikalı həmsədri Ceyms Uorlik erməni mətbuatına müsahibəsində bildirib.

Təqaüddə olan diplomatın sözlərinə görə, Türkiyə ilə sərhədin açılması Ermənistana da böyük fayda verəcək.

“Ermənistan-Azərbaycan münasibətləri yaxşılaşarsa, düşünürəm ki, Ermənistan və Azərbaycan üçün də yeni çiçəklənmə dövrü açılacaq. İnanıram ki, vaxt gələcək, məsələn, Türkiyə ilə sərhədi açmaq mümkün olacaq ki, bu da bir çox amillərə əsaslanaraq Ermənistana böyük fayda verəcək. Buna nail olmaq asan deyil, amma hesab edirəm ki, bu məsələ gündəmdə olmalıdır. Rabitə kanallarının bərpası son dərəcə vacibdir və Ermənistanın maraqlarına uyğundur, çünki bu, bir sıra məsələlərdə Rusiyadan asılılığı azaltmağa imkan verəcək. Düşünürəm ki, Azərbaycan da bundan faydalanacaq. Deməli, çox şey risk altındadır. Önəmli olan odur ki, irəliləyiş Dağlıq Qarabağ probleminin qərəzsiz həllinə əsaslanmalıdır ki, bu da, fikrimcə, regionun layiq olduğu bir çox başqa müsbət hadisələrə də qapı açacaq”, - amerikalı diplomat bildirib.

ABŞ-ın Cənubi Qafqazda maraqlarına toxunan Uorlik qeyd edib ki, ABŞ-ın bu regionda həmişə maraqları olub: "Təbii ki, ABŞ-ın Azərbaycanda enerji sektoruna maraqları artıb, lakin bununla məhdudlaşmır. Biz Cənubi Qafqazda sabitliyin qorunmasında maraqlıyıq, bizim çoxlu şəxsi və mədəni əlaqələrimiz var, xüsusən də Ermənistanla. ABŞ-da Qarabağla çox sıx əlaqələri olan böyük bir erməni-amerikan icması var. Terrorla mübarizədə də ümumi məqsədlərimiz var".