"Ermənistan Zəngəzur dəhlizinin açılmasına problemlər yaradır" - Prezidentin köməkçisi

"Ermənistan hər vəchlə Zəngəzur dəhlizinin açılmasına problemlər yaratmaqda davam edir".

Teleqraf.com xəbər verir ki, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.

O qeyd edib ki, sülh gündəliyinin bütün komponentləri - birincisi Ermənistan-Azərbaycan sülh müqaviləsi, ikincisi sərhədlərin delimitasiyası, üçüncüsü də nəqliyyat xətlərinin açılması məsələləri üzrə tamamilə qeyri-konstruktiv mühit yaranıb.

"Bunun günahkarı Ermənistan tərəfidir. Ermənistanın Üçtərəfli bəyanat çərçivəsində üzərinə götürdüyü öhdəliklərdən biri Azərbaycanın əsas hissəsi ilə Naxçıvanın birləşdirilməsinin təmin edilməsi idi. Bu öhdəliklər yerinə yetirilməyib və Ermənistan hər vəchlə Zəngəzur dəhlizinin açılmasına problemlər yaratmaqda davam edir", - Hacıyev vurğulayıb.