Şimal zonasında ən çox yayılmış xəstəliklər – FOTO/PRESS-TUR

Səhiyyə Nazirliyinin təşkilatçılığı ilə regionlarda fəaliyyət göstərən tibb müəssislərinin şəraiti ilə tanış olmaq, əhalini məlumatlandırmaq məqsədi ilə Xızı, Quba və Qusar rayonlarına press-tur təşkil edilib.

Teleqraf.com-un məlumatına görə, KİV nümayəndələri adıçəkilən rayonların xəstəxanalarındakı şəraitlə əyani tanış olublar.

Jurnalistlər əvvəlcə Xızı Rayon Mərkəzi Xəstəxanasına baş çəkiblər.

Baş həkim Bəhtaş Nəbiyevin sözlərinə görə, Rayon Mərkəzi Xəstəxanasında hazırda pediatriya, cərrahiyə, anesteziologiya, terapiya, iki çarpayıda doğuş, reanimatologiya şöbələri var: “Xəstəxana tibbi avadanlıqla təchiz olunub. Burada gün ərzində təxminən 165 nəfərə xidmət edə bilər. Rayonun bəzi yerlərində həkim məntəqələri var, həmin məntəqələrdə də gün ərzində 96 xəstəyə xidmət göstərilə bilər.

Qeydiyyatda olan 196 şəkər xəstəsi tam olaraq zəruri dərman preparatları və şəkər ölçü cihazı qlükometrlə təmin olunub. Bundan başqa, xəstəxanada qeydiyyatda olan vərəm, böyrək çatışmazlığı xəstələri də dərman preparatları ilə tam pulsuz təmin olunurlar. Xəstəxanada fəaliyyət göstərən aptek stasionar xəstələr üçün nəzərdə tutulub. Ən çox dərman tələbatı terapiya xəstələri, uşaq xəstəlikləri ilə bağlı olur”.

Qeyd edək ki, Xızı Rayon Mərkəzi Xəstəxanası 2012-ci ildən əhalinin xidmətinə verilib.

Bəhtaş Nəbiyevin sözlərinə görə, rayon xəstəxanasında 12 nəfər onkoloji xəstə qeydiyyatdadır: “Onkoloji xəstələrin sayında əvvəlki illərə nisbətən artım müşahidə olunur. Vərəm xəstəliyi ilə bağlı isə 96 nəfər qeydiyyatdadır. Bunlardan 14 nəfər dərman preparatı ilə tam təmin olunub. Böyrək xəstəliyi bağlı qeydiyyatda 3 xəstə var ki, mərkəzdə hemodializ şöbəsi olmadığndan onların müalicəsi Siyəzən Rayon Diaqnostika Mərkəzində aparılır. Həmin 3 xəstə aran bölgəsi olan Giləzi zonasındandır”.

Xəstəxanadakı avadanlıqlar əsasən Yaponiya və Almaniya istehsalıdır, 10 çarpayılıq 2 cərrahiyə otağı var. Xəstəxanada 53 tibb bacısı, 40 həkim çalışır.

Bəhtaş Nəbiyev Xızı sakinləri arasında daha geniş yayılmış xəstəliklərin adını qeyd edib: “Mədə-bağırsaq, kardioloji, ağciyər xəstəliklərinin adını çəkə bilərəm. Aşağı aran zonalarından isə əsasən göz xəstəlikləri ilə bağlı müraciətlər çox olur. Xızıda qohum evlilikləri daha çox olduğundan irsi xəstəliklər də geniş yayılıb”.

Daha sonra jurnalistlər Quba Diaqostika Mərkəzindən yollanıblar.

Mərkəzin baş həkimi Səməd Məmmədov deyir ki, xəstəxana fəaliyyətə başlayandan 10 xəstədə açıq ürək əməliyyatı, 12 xəstədə böyrəküstü əməliyyat aparılıb: “Xəstələrin müayinə və müalicəsi pulsuz təşkil edilir. Mərkəzdə 60 tibb işçisi, 4 sanitar qrup var. Bu zona üzrə ən böyük hemodializ şöbəsi Quba Diaqnostika Mərkəzindədir. Mərkəzdə 20 çarpayılıq cərrahiyə şöbəsi fəaliyyət göstərir. Quba sakinləri sırasında əsasən böyrək daşı, mədə-bağrsaq, öd daşı, ürək-damar xəstəliklərinə meyil daha çoxdur. Bu il ərzində rayonun 175 min əhalisindən 140 min nəfəri icbari tibbi müayinədən keçib”.

Quba Rayon Xəstəxanası 2010-cu ildə fəaliyyətə başlayıb. Mərkəzdə il ərzində 200 mindən çox ambulator xəstəyə baxılır, 2 minə yaxın cərrahiyyə əməliyyatı edilir.

Səfərdən bir gün sonra jurnalistlər Qusar Rayon Mərkəzi Xəstəxanasına baş çəkiblər.

Rayonun baş həkimi Mübariz Zeynalov deyib ki, xəstəxanada vərəm, reanimasiya, terapiya şöbələri, cərrahiyə, infeksion, digər bölgələrdən müraciət edən əhalinin də stasionar müalicəsi təmin edilir: “Mərkəzi onkoloji şöbəsi 10 çarpayılıdır. Lazım olan dərmanlar Milli Onkologiya Mərkəzi tərəfindən göndərilir və istifadəsi haqda vaxtaşırı onlara hesabat veririk. Digər dərman preparatları ilə təminat isə Səhiyyə Nazirliyinin İnnovasiya və Təchizat Mərkəzi tərəfindən mərkəzləşdirilmiş qaydada icra olunur. Bu yaxınlarda 300 ədəd şəkər ölçü cihazı ( qlükometr), diabet xəstələri üçün strip testləri almışıq və xəstələrə artıq paylanıb”

2012-ci ildən yenidən fəaliyyətə başlayan xəstəxanada təcili tibbi yardım, qəbul şöbəsi, şüa diaqnostika, laboratoriya, onkologiya, doğum, cərrahiyə, reanimasiya, qadın məsləhətxanası, vərəm, infeksion xəstəliklər şöbəsi fəaliyyət göstərir.

Mübariz Zeynalovun sözlərinə görə, 1 il ərzində 956 cütlük nikahdan əvvəl müayinədən keçib: “Ümumilikdə müayinədən keçənlərin 8-də sifilis, 2-də isə QİÇS virusu aşkarlanıb”.

Baş həkimin sözlərinə görə, xəstəxanada 850 nəfər işçi çalışır: “120 həkim, 450 orta tibb işçisi rayon mərkəzi xəstəxanasında, qalanları isə həkim məntəqələrində çalışır. Xəstəxanada 14 boş vakant yer var. Bunlar əsasən mama-ginekoloq, ümumi cərrah, sahə həkimi, terapevt, endokrinoloq, oftalmoloq ixtisasları üzrədir. Kənd həkim məntəqələrində məntəqə müdiri, ailə həkimləri çatışmır”.

Qusar Rayon Mərkəzi Xəstəxanasının onkologiya şöbəsinin müdiri Novruzəli Sultəliyev bildirib ki, hazırda xəstəxanada 575 nəfər onkoloji xəstə qeydiyyatdadır: “Hər il 135-140 nəfər ilkin xəstə gətirilir. Onkoloji xəstələrin sayı get-gedə artır. Səbəb insanların müayinəyə vaxtında gəlməməsidir. İnsanlar öz sağlamlıqlarına ciddi yanaşmalıdırlar”.

Şöbə müdiri qeyd edib ki, onkoloji xəstələr arasında hər il yüksək ölüm göstəriciləri var: “Qusar rayonu üzrə hər il 65-70 nəfər ölüm göstəricisi olur ki, bu da ilkin qeydiyyata götürülən xəstələrin 51-55 faizini təşkil edir. Bu, əlbəttə, çox böyük bir rəqəmdir. Xəstəxanamızda qeydiyyatda olan onkoloji xəstələrin sırasında əsasən kişilər üstünlük təşkil edir.

Kişilər arasında ağciyər, mədə xərçəngi, qadınlar arasında süd vəzi xərçəngi, uşaqlarda isə qan xərçəngi, beyin şişi, böyrək şişi növlərinə daha çox rastlanır. Onkoloji qeydiyyatda olanlardan 13 nəfəri uşaq idi, bu il 3 nəfər ölümlə bağlı qeydiyyatdan çıxarılıb”.

İlhamə ƏBÜLFƏT