FHN əhaliyə müraciət etdi

Dəm qazı təhlükəsi ilə əlaqədar Fövqəladə Hallar Nazirliyi əhaliyə müraciət edib.

Teleqraf.com-un nazirliyin rəsmi saytına istinadla verdiyi xəbərə görə, məlumatda deyilir ki, qış mövsümü ilə əlaqədar əhalinin təbii qaza olan təlabatının artması fonunda qaz cihazlarından istifadə zamanı təhlükəsizlik qaydalarının pozulması dəm qazı təhlükəsi yaradır.

Ölümlə nəticələnə bilən bu təhlükə ilə üzləşməmək üçün aşağıda göstərilən qaydalara əməl edilməlidir:

Qaz cihazı saz və standartlara uyğun olmalı; cihaz olan məkanın hündürlüyü 2 metr 20 santimetrdən az olmamalı; havaçəkən sistem işləməli, nəfəslik açıq olmalı; hamam otağında ventilyasiya borusu, qapının aşağısında dəliklər olmalı; tüstü bacaları ildə iki dəfə təmizlənməlidir.

Yadda saxlayın, dəm qazı iysizdir, hiss edilmir.

Dəm qazıbnan zəhərlənmənin əlamətləri bunlardır: baş ağrısı, baş gicəllənməsi, ürək bulanması, halsızlıq.

Dəm qazından zəhərlənmiş insanı təmiz havaya çıxarıb, nəfəsalmasını çətinləşdirən geyimlərdən azad etmək, təcili tibbi yardım çağırmaq lazımdır.

Təhlükə zamanı 112-yə zəng etmək lazımdır.

İlhamə ƏBÜLFƏT