Ağcabədidə aprel şəhidinin xatirəsi anıldı - FOTO

Ötən ilin aprel ayında Ermənistan silahlı birləşmələrinin cəbhədə törətdikləri təxribatların qarşısını alarkən şəhid olmuş Dilsuz Qarayevin xatirəsi onun doğulub boya-başa çatdığı Ağcabədi rayonunun Hindarx qəsəbəsində anılıb.

Tədbir iştirakçıları əvvəlcə qəsəbədəki Şəhidlər xiyabanını ziyarət edib, sonra kitabxanada şəhid Dilsuz Qarayevə həsr olunmuş guşə ilə tanış olublar.

Hindarx qəsəbə kitabxanası və klub müəssisələrinin birgə təşkilatçılığı ilə keçirilən tədbirdə Vətənimizin müstəqilliyi və azadlığı uğrunda şəhid olanların xatirəsi bir dəqiqəlik sükutla yad edilib.

Tədbirdə çıxış edənlər Azərbaycan Ordusunun düşmənə sarsıdıcı zərbələr endirməsindən, qəhrəman oğullarımızın döyüşlərdə göstərdiyi şücaətdən bəhs edib, işğal altında olan torpaqlarımızın azad ediləcəyinə əminliklərini bildiriblər.

Tədbirin sonunda aprel döyüşlərinin şəhidlərinə həsr edilmiş video-çarx nümayiş olunub.