Dövlət Yanğından Mühafizə Xidməti “açıq qapı” günü keçirdi - Foto

Fövqəladə Hallar Nazirliyinin Dövlət Yanğından Mühafizə Xidməti tərəfindən Binəqədi Rayon Dövlət Yanğından Mühafizə Hissəsində “açıq qapı” günü keçirilib. Tədbirdə Bakı şəhəri, Binəqədi rayonu ərazisində fəaliyyət göstərən “Mauqli” uşaq bağçasının təşkil etdiyi yay məktəbi iştirakçıları və müəllimlər iştirak edib.

Teleqraf.com xəbər verir ki, bu barədə Fövqəladə Hallar Nazirliyinin mətbuat xidmətindən məluamt verilib.

Tədbirin keçirilməsində məqsəd azyaşlıların hərtərəfli inkişafına, onların fiziki və mənəvi cəhətdən sağlam yetişməsinə, onlarda təhlükəsiz həyat fəaliyyəti mədəniyyətinin, eyni zamanda ilkin yanğın təhlükəsizliyi biliklərinin formalaşmasına və yanğınsöndürənlərin peşə fəaliyyəti barədə məlumatlılıq səviyyəsinin artırılmasına kömək etmək olub.

Tədbir iştirakçılarına yanğınsöndürənlərin gündəlik rejim qaydaları və Hissənin fəaliyyəti haqqında ətraflı məlumat verilib, ilkin yanğınsöndürmə vasitələrindən istifadə qaydaları və əməkdaşların məşqlərinin bir hissəsi də əyani şəkildə nümayiş etdirilib. Həmçinin, uşaqlar fövqəladə hallar zamanı istifadə olunan zəruri yanğınsöndürmə və digər qəza-xilasetmə texnika və avadanlıqları ilə yaxından tanış olublar.

Sonda azyaşlıların sualları cavablandırılıb.