Xocalı uşaqları İstanbula gedir

Aprelin 22-24-də Xocalı soyqırımı nəticəsində hər iki valideynini itirən şəxslərin bir qrupu İstanbula səfər edəcək. Səfər Prezident yanında QHT-lərə Dövlət Dəstəyi Şurasının nəzdində fəaliyyət göstərən Media İşçi Qrupunun icra etdiyi layihə çərçivəsində baş tutur.

Layihənin koordinatoru Fərəh Sabirqızının Teleqraf.com-a verdiyi məlumata görə, səfərdə Xocalı soyqırımı nəticəsində hər iki valideynini itirən şəxslərlə yanaşı, bir qrup jurnalist və millət vəkilinin də iştirakı planlaşdırılır. Nümayəndə heyətinin üzvləri Türkiyənin aparıcı telekanallarında çıxış edəcək, Xocalı faciəsinin baş verməsi haqqında xatirələrini açıqlayacaqlar.

Səfər iştirakçıları həmçinin 24 aprel - qondarma “erməni soyqırımı”nın 100 illiyi ilə bağlı keçiriləcək tədbirlərə də qatılacaqlar.

Bundan əlavə, İstanbulda Elşad Eyvazlının “Böyüməyən Uşaqlar” kitabının türk dilində nəşrinin, o cümlədən həmin kitab əsasında çəkilmiş “25” filminin təqdimatı da baş tutacaq.

Xatırladaq ki, hazırda “Şuşaya Azadlıq” kampaniyası nəzdində fəaliyyət göstərən Media İşçi Qrupu sosial mediada təbliğatın gücləndirilməsi istiqamətində layihə icra edir. Prezident yanında QHT-lərə Dövlət Dəstəyi Şurası tərəfindən dəstəklənən layihə çərçivəsində indiyədək bir sıra işlər görülüb, “Böyüməyən Uşaqlar ” kitabı ingilis və türk dillərinə nəşr edilib, həmin kitab əsasında “25-lər” filmi çəkilib. Hətta bu il fevralın 26-da Xocalı soyqırımının ildönümündə “25-lər” filminin və kitabın İstanbulda təqdimatı da baş tutub. Növbəti aylarda layihə çərçivəsində həmin kitab alman dilinə tərcüməsi və nəşri, Almaniyada təqdimatının keçirilməsi də planlaşdırılır.

BƏXTİYAR