İki rayonda narkotik əməliyyatı: 3 nəfər həbs edildi

Lənkəran rayonunda narkotiklərlə bağlı əməliyyat keçirilib.

Teleqraf.com xəbər verir ki, keçirilən əməliyyat zamanı rayonun Moğonojba kənd sakini, 1981-ci il təvəllüdlü Sultan Həsənova məxsus payı bəlli torpaq sahəsində kultivasiya yolu ilə əkilmiş və aqrotexniki qaydada qulluq edilmiş 11 ədəd narkotik tərkibli bitki hesab edilən çətənə kolu aşkarlanıb.

Daha bir əməliyyat Zaqatala rayonunda keçirilib. Mingəçevir şəhər sakini Kərim Nəcəfov idarə etdiyi “Mersedes Bens E 280” markalı avtomobillə Zaqatala rayonu ərazisində hərəkətdə olarkən yol polisi əməkdaşları tərəfindən saxlanılıb. O, rayon polis şöbəsinə gətirilib.

Kərim Nəcəfovun avtomobilinə baxış keçirən zaman avtomobilin qabaq kapotunun iç örtüyünün altında gizlədilmiş politelin torbanın içərisində 21 ədəd kibrit qutusunda narkotik vasitə hesab olunan qurudulmuş marixuana aşkarlanaraq götürülüb.

Məlum olub ki, Kərim Nəcəfov tanışı olan Balakən rayon sakini Elnur Məmmədovla Zaqatala rayonunun Mazıx kəndi ərazisində görüşərək ondan 21 ədəd kibrit qutusunda qablaşdırılmış narkotik vasitəni 650 manata alıb.

Keçirilmiş tədbir nəticəsində Elnur Məmmədov da tutularaq istintaqa təhvil verilib.

Hacı Zeynalov