Sabirabadda anbardan oğurluq edənlər həbs edildi

Sabirabad rayon Moranlı kəndində oğurluq hadisəsi baş verib.

Teleqraf.com xəbər verir ki, kənd sakini Zahir İsparov ötən il dekabrın 30-da ərizə ilə Sabirabad rayon polis şöbəsinin Qaragüney polis bölməsinə müraciət edərək, dekabr ayı ərzində kənddə olmadığı müddətdə mağazasının arxasında yerləşən anbardan naməlum şəraitdə dəyəri 4500 manat olan 15 kisə yonca toxumunu oğurlanması barədə məlumat verib.

Polis bölməsinin əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən şəxslər saxlanılıblar.

Aparılmış tədbirlərlə onların rayonun Zalqarağac kənd sakinləri Nurlan Mustafazadə, İlham Əlizadə və Kamran Bayramov olması müəyyən edilib.

O da aydın olub ki, sonuncu iki şəxs əvvəllər məhkuluq həyatı yaşayıblar.

N.Ə.Mustafazadə, İ.C.Əlizadə və K.R.Bayramov saxlanılaraq sonrakı tədbirlərin aparılması üçün rayon polis şöbəsinin istintaq bölməsinə təqdim olunublar.