DİN-dən 9 rayonda və 1 şəhərdə - Əməliyyat

Ötən gün həyata keçirilən əməliyyat-axtarış tədbirləri nəticəsində çəkisi 12 kiloqrama yaxın narkotik vasitə, xüsusi aqrotexniki qaydada yetişdirilən 130 ədəd narkotik tərkibli bitkilər polis əməkdaşları tərəfindən aşkar edilərək götürülüb, həmçinin yabanı halda bitmiş, çəkisi 13 tona yaxın çətənə kolları məhv edilib.

Bu barədə Teleqraf.com-a Daxili İşlər Nazirliyinin mətbuat xidmətindən məlumat verilib.

Məlumata görə, Ağcabədi rayon polis şöbəsinin əməkdaşları şəhər sakini Səfər Mamedovun Şənlik kəndi ərazisindəki torpaq sahəsindən 9 kiloqram 515 qram marixuana, Neftçala rayon polis şöbəsinin əməkdaşları Ərəbqardaşbəyli kənd sakini Vüqar Məmmədovdan 16 qram, həyətindən isə 950 qram marixuana aşkarlayıblar.

Oxşar əməliyyatı Sumqayıt şəhər Polis İdarəsinin 4-cü polis bölməsinin əməkdaşları da keçirib. Şəhər sakinləri, əvvəllər məhkum olunmuşlar - Bəhlul Cəbiyevdən 485 qram, Pyotr Briyukovdan isə 480 qram marixuana aşkarlayıblar.

Bundan başqa, Baş Narkotiklərlə Mübarizə İdarəsi və Binəqədi rayon Polis İdarəsinin 6-cı polis bölməsinin əməkdaşları Biləcəri qəsəbə sakini G.Adıgözəlovanın evindən dibçəkdə kultivasiya yolu ilə yetişdirilmiş 44 ədəd çətənə kolu aşkarlayaraq götürüblər.

Daha bir əməliyyatı Xəzər rayon Polis İdarəsinin əməkdaşları keçirib. Türkan qəsəbə sakini Zaur İbrahimovun həyətindən kultivasiya yolu ilə yetişdirilmiş 33 ədəd çətənə kolu tapılıb.

Oxşar əməliyyatı Astara rayon polis şöbəsinin əməkdaşları da keçirib. Şahağacı kəndi sakini, əvvəllər məhkum olunmuş Xosrov Rüstəmovun torpaq sahəsindən kultivasiya yolu ilə yetişdirilmiş 52 ədəd çətənə kolu aşkar edilib.

Göygöl rayon polis şöbəsinin əməkdaşları Sarısu kəndi ərazisindən yabanı halda bitmiş çəkisi 5,5 ton olan 1553 ədəd, Nəqliyyatda Baş Polis İdarəsinin əməkdaşları Ağstafa dəmir yolu stansiyanın ərazisində çəkisi 80 kiloqram olan 106 ədəd, Zaqatala rayon polis şöbəsinin əməkdaşları Yengiyan kəndi ərazisindən çəkisi 6 ton olan 12901 ədəd, Samux rayon polis şöbəsinin əməkdaşları Çobanabdallı kəndi ərazisindən çəkisi 600 kiloqram olan 3340 ədəd, Gədəbəy rayon polis şöbəsinin əməkdaşları Yeni Saratovka və Qoşabulaq kəndləri ərazisindən çəkisi 800 kiloqram olan 1600 ədəd yabanı halda bitmiş çətənə kollarını yığaraq məhv ediblər.

Bu istiqamətdə tədbirlər davam etdirilir.