Polisdən üç rayonda əməliyyat: Silahlı şəxslər tutuldu

Nacıqabul rayonunda silahlı şəxsin tutulması üçün əməliyyat keçirilib.

Teleqraf.com xəbər verir ki, Nəqliyyatda Baş Polis İdarəsi əməkdaşlarının əldə edilmiş məlumat əsasında Hacıqabul dəmir yolu stansiyasının ərazisində keçirdikləri əməliyyat-axtarış tədbirləri nəticəsində şəhər sakini, əvvəllər məhkum olunmuş S.Məmiyev həbs edilib.

Ondan nömrəsi silinmiş “AKM” markalı silah və 1 ədəd patron darağı aşkar edilib.

Bundan başqa, İsmayıllı rayon polis şöbəsi əməkdaşlarının əldə edilmiş məlumat əsasında keçirdikləri əməliyyat-axtarış tədbirləri nəticəsində Ruşan kənd sakini M.Şirinovdan “İJ-16” markalı tüfəng aşkar edilərək götürülüb.

Daha bir əməliyyat Göygöl rayonunda keçirilib.

Göygöl rayon polis şöbəsi əməkdaşlarının əldə edilmiş məlumat əsasında keçirdikləri əməliyyat-axtarış tədbirləri nəticəsində Topalhəsənli kənd sakini M.Həsənovun həyətindən nömrəsi silinmiş, lüləsi və qundağı kəsilmiş “Karabin” markalı tüfəng və 29 ədəd patron aşkar edilib.

Hər üç faktla bağlı araşdırma aparılır.