Etibar Əliyevin generala qarşı 3 milyonluq iddiası təmin edildi – Qərar

“Texnikabank” ASC-nin Müşahidə Şurasının sabiq sədri Etibar Əliyevin ləğv edilmiş Milli Təhlükəsizliyi Nazirliyi Baş İstintaq İdarəsinin rəisi, general-mayor Mövlam Şıxəliyev və İstintaq Baş İdarəsinin ibtidai istintaq idarəsinin 2-ci şöbəsinin rəisi vəzifəsində işləmiş polkovnik-leytenant Vüsal Ələkbərova qarşı mülki iddiası təmin edilib.

Teleqraf.com-un xəbərinə görə, bu barədə Bakı Hərbi Məhkəməsinin hakimi Elbəy Allahverdiyevin sədrliyi ilə elan olunan hökmdə qeyd olunub.

Hökmə əsasən cinayət işi üzrə zərərçəkmiş şəxslər Əliyev Etibar Mahmud oğlu, onun həyat yoldaşı Bayramova Esmira Məcid qızı və oğlu Əliyev Kəramət Etibar oğlunun mülki iddiaları təmin edilib.

3.515.500 manat məbləğində pul vəsaiti, eləcə də iddianın təmin edilmiş hissəsinə mütənasib olaraq 2.547,50 manat məbləğində dövlət rüsumu təqsirləndirilən şəxslər Mövlam Şixəliyev və Vüsal Ələkbərovdan müştərək qaydada tutulması barədə hökm çıxarılıb.

Qeyd olunan pulların Etibar Əliyev, Esmira Bayramova və Kəramət Əliyevə qaytarılması tələb olunub.

İttihama görə, MTN 6 mart 2012-ci ildə Etibar Əliyevi həbs edib. Onun həbsdən azad olunması üçün 3.000.000 manat məbləğində əmlakını tələb ediblər. Etibar Əliyev həmin tələbi rədd edən zaman növbəti günlərdə oğlu Kəramət Əliyevi MTN-nin inzibati binasına çağırıblar. Onu həbs olunacağı, həbs olunduqdan sonra müvəqqəti saxlama yerində saxlanılmaqla şəxsiyyəti üzərində zor göstəriləcəyi, habelə bu məlumatları kütləvi informasiya vasitələrində yaymaqla rüsvay edəcəyi ilə hədələyiblər.

Bundan sonra Vüsal Ələkbərov Kəramət Əliyevdən tələb olunan 500.000 avro alıb.

Daha sonra Mövlam Şıxəliyev Vüsal Ələkbərovun vasitəsi ilə MTN-nin inzibati binasında Etibar Əliyev və Kəramət Əliyevdən tələb olunan məbləği tam həcmdə çatdırmaları üçün Bayramova Esmira Məcid qızının adına olan Bakı şəhəri, Ak.Həsən Əliyev küçəsi 63 ünvanında yerləşən 5 mərtəbəli evi satıb və 3.000.000 manat məbləğində pulun tam həcmdə verilməsini tələb edib.

Mövlam Şıxəliyev və Vüsal Ələkbərovun hədəsini r real qəbul edən və oğlu Kəramətin həbs olunacağından ehtiyatlanan Etibar Əliyev onlarla razılaşıb. 3 miyon manatı onlara verib.

Xatırladaq ki, Bakı Hərbi Məhkəməsinin hökmü ilə Mövlam Şıxəliyev 12 il müddətinə azadlıqdan məhrum edilib.

Onunla birlikdə mühakimə olunan ləğv edilmiş Milli Təhlükəsizlik Nazirliyi Baş İstintaq İdarəsinin rəis müavini, 1-ci şöbənin rəisi Yasin Məmmədov 10 il 6 ay, istintaq idarəsinin 2-ci şöbənin rəisi, polkovnik Vüsal Ələkbərov 12 il 6 ay və istintaq idarəsinin metodiki yardım və kriminalistika şöbəsinin rəis müavini Sahib Ələkbərov 8 il müddətinə azadlıqdan məhrum edilib.

Zamində olan Yasin Məmmədov, Sahib Ələkbərov və Vüsal Ələkbərovun barəsində həbs-qətimkan tədbiri seçilib. Onlar məhkəmə zalından həbs edilib.

Mövlam Şıxəliyevin general-mayor rütbəsindən məhrum edilməsi barədə Prezidentə təqdimat göndərilməsi barədə qərar çıxarılıb.

Həmçinin Mövlam Şıxəliyevin və ailə üzvlərinə məxsus bir sıra əmlakların müsadirə olunması barədə qərar çıxarılıb.

Bundan başqa, Vüsal Ələkbərov, Sahib Ələkbərov və Yasin Məmmədov polkovnik-leytenat rütbələri əlindən alınıb.

Həmçinin Mövlam Şıxəliyev, Vüsal Ələkbərov, Sahib Ələkbərov və Yasin Məmmədova verilmiş orden və medallardan məhrum olunublar.

İttihama görə, Mövlam Şıxəliyev İstintaq Baş İdarəsinin rəisi vəzifəsində çalışdığı 2008-2014-cü illərdə qeyd edilən qurumun tərkibindəki şöbənin sabiq rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərov ilə mütəşəkkil dəstə tərkibində iş adalarından hədə-qorxu yolu ilə külli miqdarda pul tələb ediblər.

İstintaqla Mövlam Şıxəliyevin mütəşəkkil dəstə halında ümumilikdə 14 milyon 292 min manat məbləğində pul vəsaitini rüşvət qismində, 5 milyon 77 min manat məbləğində özgə əmlakını hədə-qorxu ilə tələb edib almasına, həmçinin səlahiyyət həddini aşması və sübutları saxtalaşdırmasına əsaslı şübhələr müəyyən edilib.

Mövlam Şixəliyevə Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma) və digər maddələri ilə ittiham elan edilməklə barəsində məhkəmənin qərarı ilə həbs qətimkan tədbiri seçilmiş, Vüsal Ələkbərov, Yasin Məmmədov və Sahib Ələkbərov həmin Məcəllənin 311.3.1, 341.2.1, 341.2.3-cü (vəzifə səlahiyyətlərindən sui-istifadə və ya vəzifə səlahiyyətlərini aşma) və digər maddələri ilə təqsirləndirilən şəxs qismində cəlb edilməklə barələrində müvafiq qətimkan tədbirləri seçilib.

Dəstə üzvlərinin qanunsuz əməllərindən iş adamları Qurbanov Mehrac Qurban oğlu, Cəfərov Etibar Vahid oğlu, Qurbanov Akif Teymur oğlu, Abdullayev Orxan Elman oğlu, Hacıyev Cavidan Mustafa oğlu, Musayeva Railə Rafkat qızı, Əliyev Kəramət Etibar oğlu, Əliyev Zaur Ağahüseyn oğlu, İsmayılov Afət Davud oğlu, Rəşidov Azad Niyazi oğlu, Səfərov Hüseyn Nəriman oğlu, Salahov Müsənnif Hilal oğlu, Seyidov Ceyhun Mahmud oğlu, Mirzəyev Əhməd Məhəmməd oğlu, İsmayılov Sərdar Əhməd oğlu, Əliyev Elvar Layıq oğlu, Nəcəfov Seyran Burhan oğlu, Kərimov Rauf Faiq oğlu, Bağırov Qulam Davud oğlu, Baloğlanov Qüdrət Baloğlan oğlu, Zeynalov İbrahim Məhəmməd oğlu, Həsənov Rauf Qasım oğlu, Əliyev Ələddin Hüseyn oğlu, Heydərov Anar Sadıx oğlu, Sultanov Bahəddin Abdulla oğlu, Mədətov Elşən İsmayıl oğlu, Ağamalıyev Ağasalam Mövlud oğlu, Rzayev Namil Heydər oğlu, Əliyev Etibar Mahmud oğlu, Kazımov Nizami Firudin oğlu, Həsənəliyev Əfsəl Xanlar oğlu və Bayramova Esmira Məcid qızı zərər çəkiblər.