Bankın sabiq əməkdaşının kasasiya şikayəti təmin edilmədi

Ali Məhkəmədə “Parabank” Açıq Səhmdar Cəmiyyətinin Nizami filialının sabiq kredit mütəxəssisi Orxan Uğurluzadənin məhkəmə qərarından verdiyi kasasiya şikayətinə baxılıb.

Teleqraf.com xəbər verir ki, Orxan Uğurluzadə bir neçə nəfərlə qabaqcadan razılaşıb cinayət əlaqəsinə girərək müvafiq sənədlərin məzmununa tamah niyyəti ilə bilə-bilə yalan məlumatları daxil etməklə vəzifə səlahiyyətlərindən sui-istifadə edib aldatma yolu ilə 228 şəxsə kreditlərin ayrılmasına nail olaraq ümumilikdə 127 min 804 manat məbləğində banka məxsus külli miqdarda əmlakı ələ keçirib.

Orxan Uğurluzadəyə Cinayət Məcəlləsinin 178.3.2 (qulluq mövqeyindən istifadə etməklə dələduzluq), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələrinə əsasən ittiham edilib.

Bakı Ağır Cinayətlər Məhkəməsinin hökmü ilə Orxan Uğurluzadə 8 il müddətinə azadlıqdan məhrum edilib. Hökmdən narazı qalan Orxan Uğurluzadə apelyasiya şikayəti verərək barəsində bəraət hökmünün çıxarılmasını istəyib.

Bakı Apelyasiya Məhkəməsində, hakim Sahibxan Mirzəyevin sədrliyi ilə keçirilən prosesdə apelyasiya şikayəti üzrə ilkin baxış iclasında apelyasiya şikayətlərinə məhkəmə istintaqı aparılmadan baxılması barədə qərar qəbul edilib. Qərardan narazı qalan Orxan Uğurluzadə kasasiya şikayəti verib. O, Ali Məhkəməyə göndərdiyi şikayətində apelyasiya instansiyasında işinə məhkəmə istintaqı aparılmaqla baxılmasını istəyib.

Hakim Gülzar Rzayevanın sədrliyi ilə keçirilən prosesdə Orxan Uğurluzadənin kasasiya şikayəti üzrə qərar elan edilib. Qərara görə, onun kasasiya şikayəti təmin edilməyib.

Hacı Zeynalov