19 Noyabr 2017 10:24
1 743
12 Punto 14 Punto 16 Punto 18 Punto

“Qiraətçi”də Ümid Nəccari:

Çətirləri bağlayın

Ağlayırdı...

Buludlara ip bağlayıb çərpələng edən şəxs!

Ağaclar payızın üstünə külək əsdirirdi.

Payız üşüyürdü.

Üşüdükcə payız,

qolları budaqlardan tökülürdü.

Gördüyümüz hər nə varsa, əsirdi.

Gödəkcələr üşüyürdü insanların əynində.

Bu andaydı ki,

Qucağı dözə bilmirdi kimsəsizliyə!

Bu andaydı ki,

Qucağı qocalırdı, qucağı ölürdü…

Adı məlum, gözləri məchul olan şəxs

Gözləri dükanin vitrinindəki qalandan bəri

Kor oldu, kor!

Kor olandan sonra

şəhərdə işıqları süpürdülər süpürgəçilər.

Və sonra qatarların kupelərinə doldu insanlar,

Kupelər boşaldı insanlıqdan…

Uşaqlığı bir abidə idi yoxsulluq parkında.

Daş kimi sərt,

Gül kimi zərif.

Həyat gahdan yaş, gahdan quruydu.

Amma daima qupquru çörək idi

mən deyən kəsin həyatı.

Hava da havalanmışdı.

Yox, soyuğu demirəm,

Qarda deyil dediyim,

Sadəcə ulduzlar əllərini kəsirdi gecələr

Və qanından qanad açırdi kəpənəklər.

Kəpənəklər qeyb olurdu qaranlıqda.

Hələ də "azadlıq" dırnaq arasındaydı,

Hələ də “azadlıq” meydanında azalırdı hava.

Divar depressiyadaydı!

Evdən çölə çıxa bilmirdi divarlar.

İnqilab küçəsində kimsə yoxuydu

quru yarpaqlardan başqa

Başqa söz,

Telvizorda xəbəri deyən qız:

"Bu gecə sıfır dərəcədir proqnoz

Bu sözlə bitir xəbərlərimiz"

Ağlayırdı...

xəbəri bilən kəs.

Göyüzü peyğəmbəri deyir,

“Tanrı göyü sevsə də, göydələnləri sevmir”

Ağlayır...

Üzü ağappaq olan kəs

Gül ilə güllənin fərqini soruşmadı

İnsanlıq fənnini keçən müəllimimiz!

Universitetdə azalırdı gündən-günə sevdiyi qız.

Qısalırdı gündüzlər...

Soyuq pambıq yağırdı küçələrə…

Üşüməyə tələsmə, küçədə oturan şəxs!

Tanrı yastığını silkələyir təkcə...

Çətirləri bağlayın,

çətirlər göy üzünə böyük etirazdır.

Gecə gəldikdə,

Hamı maskasını qucaqlayıb yatır.

Saçlarındakı məktubları yolduqca,

Qağayılar azalırdı dənizdə...

Yenə ağlayır...

işini itirən şəxs.

Heyif ki,

güzgülərin nişan barmağı yoxdur

üzük taxmaq üçün…

Yenə də ağlayır,

Hamını güldürən kəs...

Üstündə yeridiyi kəndirin

uzunluğu qədərdir həyatı

Ağlayır...

Küçədə oturub,

İşini itirən kloun…


Müəllif: Teleqraf.com