“Əli və Nino” oktyabrın 6-dan kinoteatrlarda

Çoxdan gözlənən “Əli və Nino” filmi oktyabr ayının 6-dan etibarən “Cinema Plus” kinoteatrlar şəbəkəsində nümayiş olunacaq.

Teleqraf.com xəbər verir ki, kinoteatr filmin treylerini rəsmi səhifəsində yayıb.

"Əli və Nino" filminin icraçı prodüseri Leyla Əliyeva, prodüseri Kris Tikyer, rejissoru "BAFTA" mükafatı sahibi Asif Kapadia, ssenari müəllifi isə "Academy Award" mükafatı laureatı Kristofer Hemptondur.

Filmin çəkilişlərinə 2015-ci il fevralın 24-dən başlanılmışdı və iyun ayınadək davam edib. Çəkilişlər Bakıda, tarixi İçərişəhər küçələrində və paytaxtın bir sıra məkanlarında, Qobustan, Xınalıq və s. ərazilərdə aparılıb.

Filmdə Adam Bakri, Mariya Valverde, Halit Ergenç, Mendi Petinkin, Konni Nilson, Rikkardo Samariko, Humayon Erşardi, Fəxrəddin Manafov, Əsad Bub, Numan Akar və digər məşhur aktyorlar çəkiliblər.

Nərmin