Rusiyadan İrəvana xəbərdarlıq: “Siyasiləşdirməyin…”

Rusiyanın Ermənistandakı səfirliyi Gümrü şəhərində baş verən faciəli hadisəni siyasiləşdirməməyə çağırıb.

Teleqraf.com xəbər verir ki, səfirlik bir neçə gün əvvəl baş vermiş hadisə ilə əlaqədar bəyanat yayıb.

Bəyanatda deyilir:

“Biz bu mövzunu siyasiləşdirməməyə, tələsik nəticələr çıxarmamağa və istintaq orqanlarının işlərini yerinə yetirməsinə mane olmamağa çağırırıq. Zərər çəkmiş şəxsin yaxınlarına və həyat yoldaşlarına başsağlığı veririk”.

Xatırladaq ki, dekabrın 3-də 57 yaşlı süpürgəçi Julietta Qazaryan Gümrüdə naməlum şəxs tərəfindən döyülüb. Qadının vəfat etməsindən sonra cinayət işi açılıb.

Dekabrın 11-də Ermənistan Baş Prokurorluğu ölümlə nəticələnən hadisə ilə əlaqədar Gümrüdə yerləşən 102-ci rus hərbi bazasının əsgərinin həbs olunduğunu bildirib. Lakin hərbçinin Ermənistanda yox, Rusiyanın istintaq orqanları tərəfindən hərbi bazada mühakimə olunması Gümrüdə etirazlara səbəb olub.