Üfüqdə görünən savaş: “Rusiyanın qarşısını ala bilməyəcəklər”

“National Interest” qəzetininin amerikalı siyasi analitiki Mark Episkopos Rusiya ilə hərbi qarşıdurma vəziyyətində Ukraynanın şansını qiymətləndirib.

Teleqraf.com xəbər verir ki, analitik Kiyevdə Rusiyanın raket sistemlərinin qarşısını ala biləcək müdafiə komplekslərinin olmadığını iddia edib.

O, Krımda quraşdırılmış “S-400” raket komplekslərinin Ukrayna əraziləri üçün ciddi təhlükə yaratdığını, 400 kilometr məsafədəki hədəfləri vurmağı bacardıqlarını deyib. Eyni zamanda, Rusiya ordusunun arsenalındakı “Su-35” qırıcılarının düşmən aviasiya və əsas infrastrukturlarını asanlıqla vura biləcəyinə diqqət çəkib.

Bundan əlavə, Kiyevdə Rusiyanın “T-90A” və 2S19 “Msta” özüyeriyən haubitsalarına tab gətirmək üçün kifayət qədər tankının olmadığını söyləyib.

“Rusiyanın böyük hava üstünlüyü və müasir raket əleyhinə müdafiə sistemlərini nəzərə alaraq, Ukrayna ordusu bu sistemlərin yaratdığı təhlükəyə qarşı problemlərlə üzləşəcək”, - Episkopos deyib.

Bununla belə, bölgədə güc balansını dəyişdirə biləcək beynəlxalq müdaxilənin olacağını da istisna etmədiyini vurğulayıb.