Rezo Qabriadze öldü... – Ən populyar gürcü filmlərinin ssenaristi idi

Gürcü və sovet ssenaristi, dramaturq, teatr və kino rejissoru, rəssam və heykəltəraş Rezo Qabriadze 85 yaşında Tbilisidə vəfat edib.

Teleqraf.com xəbər verir ki, bu barədə Gürcüstanın Təhsil Nazirliyi açıqlama yayıb.

“Gürcüstanın Təhsil, Elm, Mədəniyyət və İdman Nazirliyi Gürcüstanın xalq artisti, Şota Rustaveli adına dövlət mükafatı laureatı, görkəmli yazıçı, sənətkar, teatr və kino rejissoru Rezo Qabriadzenin vəfatı ilə əlaqədar dərin hüznlə başsağlığı verir”, - deyə açıqlamada bildirilib.

Qabriadze 1936-cı ilin iyun ayında Kutaisidə anadan olub.

“Mimino”, "Kin-dza-dza", “Ağlama!”, “Kvevri”, “Serenada” kimi filmlər də daxil olmaqla 35-dən çox gürcü və sovet filminin ssenari müəllifidir.

Həmçinin, 50-dən çox kitab üçün illüstrasiyalar da yaradıb.

1981-ci ildə Tbilisi Kukla Teatrını qurub, 1994-cü ildə Sankt-Peterburqda ucaldılmış Çijik-Pıjik abidəsinin müəllifi də odur.