Ermənistanda demoqrafik krizis: “Doğuş əmsalı ən aşağı səviyyədə...” - Professor

Ermənistanda ümumi doğum əmsalı 1,65 təşkil edir və bu, iyirmi ildən artıqdır əhalinin sadə təkrar istehsalından xeyli aşağıdır. Bu göstərici qonşu ölkələrlə müqayisədə aşağıdır: məsələn, Azərbaycanda doğum səviyyəsi 1,86, Gürcüstanda isə 1,75-dir.

Teleqraf.com erməni mediasına istinadən xəbər verir ki, bu barədə İrəvan Tibb Universitetinin rektoru Armen Muradyan bildirib.

O bildirib ki, Ermənistandakı demoqrafik vəziyyət öz əhəmiyyətinə görə, mümkün qədər tez həll edilməli əsas problemlərdəndir:

“Doğum nisbəti əhali artımının açarıdır. BMT-nin İqtisadi və Sosial Məsələlər Departamentinin (UNDESA) son hesabatı göstərir ki, məhsuldarlığın azalması qlobal xarakter daşıyır. Dünya əhalisinin 2/3-si ümumi məhsuldarlıq səviyyəsinin 2,1 həddindən aşağı olduğu ölkələrdə yaşayır. Ermənistanın daxil olduğu Avropa regionunda bu göstərici 1,5-dir”.

Muradyan deyib ki, Ermənistanda ümumi doğum əmsalı 1,656 təşkil edir. İyirmi ildən artıqdır ki, bu, əhalinin sadə təkrar istehsalından xeyli aşağıdır və bu əhalinin təbii azalması nöqteyi-nəzərindən təhlükəlidir.

Ermənistan Statistika Komitəsinin məlumatına görə, 2021-ci ildə Ermənistanda 36585 uşaq doğulub, bu rəqəm əvvəlki illərlə müqayisədə bir qədər çox, lakin 2017-ci illə müqayisədə 1115 uşaq azdır. 2000-ci illərdəki qısa dövr istisna olmaqla, mənfi dinamika 30 ildən artıqdır saxlanılır. 2021-ci ildə doğulanların sayı 1990-cı ildəki doğumların sayından 2,2 dəfə azdır.

BMT DESA-nın proqnozlarına görə, 2050-ci ildə Ermənistanda yeni doğulanların sayı 2400-ə düşə bilər, ümumi doğuş əmsalı isə 1,6 olacaq.