Bakı polisindən əməliyyat – Həbs olunanlar var

Bakının Xəzər rayonunda oğurluq edən şəxslərin müəyyən edilməsi üçün əməliyyat keçirilib.

Teleqraf.com xəbər verir ki, Xəzər Rayon Polis İdarəsinin 1-ci Polis Şöbəsi əməkdaşlarının keçirdikləri tədbirlərlə müxtəlif vaxtlarda Şağan qəsəbəsi ərazisində 4 evdən ümumilikdə 16000 manat dəyərində kombi aparatları, su qızdırıcısı və məişət əşyaları oğurlamaqda şübhəli bilinən Qabil Nəsirov və əvvəllər narkotiklərlə əlaqəli cinayətə görə məhkum olunmuş Elmar İbrahimov müəyyən olunaraq saxlanılıblar.

Bundan başqa, Qaradağ Rayon Polis İdarəsinin 10-cu Polis Şöbəsi əməkdaşlarının keçirdikləri tədbirlərlə Lökbatan qəsəbəsi ərazisində bir qadının içərisində pulu olan çantasını, bir nəfərin isə mobil telefonunu oğurlamaqda şübhəli bilinən Tahir Babayev tutulub.

Nərimanov Rayon Polis İdarəsinin 16-cı Polis Şöbəsi əməkdaşlarının keçirdikləri tədbirlərlə fevralın 5-də bir nəfərin bank kartından 190 manatını oğurlamaqda şübhəli bilinən Akif Hümbətov müəyyən olunaraq saxlanılıb.

Fevralın 11-də saat 12 radələrində Qaradağ rayonu ərazisində yerləşən postda “VAZ-211440” markalı avtomobil Baş Dövlət Yol Polisi İdarəsinin əməkdaşları tərəfindən saxlanılıb.

Sürücü Araz Abdullayevin narkotik vasitə istifadə etməsi müəyyən edildiyindən barəsində inzibati protokol tərtib olunaraq Qaradağ Rayon Polis İdarəsinin 11-ci Polis Bölməsinə təhvil verilib.

Məhkəmənin qərarı ilə A.Abdullayev 30 gün müddətinə inzibati qaydada həbs edilib.