“Qarabağ” “Ludoqorets”i məğlub etsə, bu komandalardan biri ilə qarşılaşacaq

“Qarabağ”ın Çempionlar Liqasının pley-off mərhələsindəki səbəti müəyyənləşib.

Teleqraf.com xəbər verir ki, Azərbaycan çempionu həmin raunda yüksəlsə, püşkatma zamanı səpələnməmişlər səbətində qərarlaşacaq. Buna səbəb PAOK (Yunanıstan) və “Ferensvaroş”un (Macarıstan) mərhələ adlaması olub.

Bu iki komandanın III təsnifat mərhələsində təşkil etdiyi cüt “Qarabağ”ın potensial rəqibləri olacaq. Digər mümkün rəqiblər isə pley-offdan yarışa qoşulacaq “Dinamo” (Zaqreb, Xorvatiya), “Srvena Zvezda” (Serbiya) və “Yanq Boyz” (İsveçrə) olacaq. Təbii ki, bunun üçün “Qarabağ” 3-cü təsnifat mərhələsində Bolqarıstan “Ludoqorets”ini məğlub etməlidir.

Pley-off mərhələsinin püşkü avqustun 5-də atılacaq. Bu raundun oyunları isə avqustun 20-21-də və 27-28-də keçiriləcək.