Yeni “Samsung” smartfonları təqdim edildi

“Samsung” şirkəti “Galaxy A50s” və “Galaxy A30s” smartfonlarını nümayiş etdirib. Orta qiymət seqmentinə aid qurğular barmaq izi skaneri ekran altında yerləşən 6,4 düym diaqonallı displeylərlə təchiz edilib.

Teleqraf.com xəbər verir ki, “Galaxy A30s” modeli 25, 8 və 5 meqapikselli üç əsas kamera, 16 meqapikselli ön kamera, 15 vattadək sürətli enerjidoldurmanı dəstəkləyən 4 min milliamper/saat tutumlu batareya ilə təchiz olunub. Qurğunun aparat əsasını səkkiznüvəli (iki 1,8 QHs və altı 1,6 QHs) prosessor, 3 və ya 4 giqabaytlıq operativ və 32, 64 və 128 giqabaytlıq quraşdırılmış yaddaş təşkil edir.

“Galaxy A50s” modeli 48, 8 və 5 meqapikselli üç əsas arxa kamera, 32 meqapikselli ön kamera, “Galaxy A30s” kimi analoji tutuma malik akkumulyator, səkkiznüvəli (dörd 2,3 QHs, və dörd 1,7 QHs) prosessor, 4 və ya 6 giqabaytlıq operativ və 64 və 128 giqabaytlıq quraşdırılmış yaddaşla təchiz edilib.

Yeni smartfonlar “Samsung One UI” interfeysli “Android 9.0 Pie” əməliyyat sisteminin idarəetməsi ilə işləyir.