“Putin onu ağıllandıracaq” – Müsahibə

Teleqraf.com Milli Məclisin deputatı Rasim Musabəyovla müsahibəni təqdim edir:

- Rasim müəllim, Nikol Paşinyanın BMT Baş Assambleyasında çıxışını necə şərh edərdiniz?

- Hesab edirəm ki, Paşinyanın BMT-dəki çıxışı küçə demaqoqunun çıxışı idi. Başqa sözlə, Paşinyanın çıxışı dövlət və ya hökumət başçısının çıxışına bənzəmirdi. Bu, birmənalıdır.

- Paşinyan çıxışında həm Azərbaycana qarşı qəbuledilməz iddialar irəli sürür, həm də deyir ki, danışıqlar prosesinə hazırdır...

- Paşinyan qələt edir, başını divara vurur. Onun BMT-dəki çıxışı o deməkdir ki, bu adam masa ətrafına əyləşib konstruktiv danışıqlara aparmağa hazır deyil. Və ola bilsin ki, təbiətinə görə, o ümumiyyətlə, belə danışıqlar apara bilməz. Paşinyan elə bilir ki, BMT-də əyləşənlər İrəvanın küçələrində onu dinləyən mitinq iştirakçılardır.

- O, iddia etdi ki, Dağlıq Qarabağ Azərbaycanın yurisdiksiyasına qayıtsa, orada yaşayan ermənilər deportasiya oluna bilər...

- Bir daha deyirəm ki, onun çıxışı küçə demaqoqunun çıxışından ciddi fərqlənmədi. Bu adam durub belə fikirlər işlərdir, amma ortada BMT Təhlükəsizlik Şurasının dörd qətnaməsi var. Eləcə də BMT Baş Assambleyasının qərarı var. Paşinyan isə elə çıxış edir ki, sanki bu sənədlər kağız parçasıdır, apar tulla. Beləcə cəfəng fikirlər səsləndirir. İddia edir ki, Dağlıq Qarabağ Azərbaycana qaytarılsa, oradakı ermənilər deportasiya olunacaq. Sən yeddi rayonu işğal etmisən, hansı ki, bu ərazilərdən qoşunlarını çıxarmalısan. Sən orada yaşayan insanlara qarşı etnik təmizləmə həyata keçirmisən, yüzlərlə azərbaycanlını öldürmüsən. Bunu etmisən və özün də iddia edirsən ki, Azərbaycan Qarabağdakı erməniləri oradan çıxaracaq və s. Belə bir fakt yoxdur. Əksinə, Azərbaycan deyir ki, Dağlıq Qarabağa ən yüksək səviyyədə özünüidarəetmə, təhlükəsizlik təminatı verir. Bunların hamısını Azərbaycan tərəfindən irəli sürülüb. Paşinyan isə bunları atır bir kənara və sərsəm-sərsəm danışır.

- Paşinyanın Azərbaycanın Dağlıq Qarabağdakı separatçı rejimlə danışıqlar aparması tələbini necə qiymətləndirmək olar?

- Ortada BMT Təhlükəsizlik Şurasının qətnamələri var. Həmin sənədlərdə vurğulanır ki, Ermənistanın işğalçı ordusu bu torpaqlardan çıxarılmalı, kommunikasiyalar açılmalı, qaçqınlar öz yerlərinə qayıtmalı və sonra Dağlıq Qarabağın statusu ilə bağlı danışıqlar aparılmalıdır. Yəni erməni öz qoşunlarını çıxarandan, təhlükəsizlik təmin edildikdən sonra Dağlıq Qarabağın statusuna dair danışıqlar başlanmalıdır. Azərbaycan heç vaxt deməyib ki, Dağlıq Qarabağın erməni icması ilə statusa dair müzakirə aparmayacaq. Sözsüz ki, aparacaq, amma iş ondadır ki, danışıqlar prosesində, sülh sazişində ardıcıllıq olmalıdır. Bu ardıcıllıq prinsipinə əsasən ilk olaraq, işğalçı ordu Azərbaycan torpaqlarından geri çəkilməlidir.

- Ancaq Paşinyan bəyan edir ki, Azərbaycan birbaşa Dağlıq Qarabağdakı separatçı rejimlə danışıqlar aparsın...

- Sanki Ermənistan işğalçı dövlət deyil. Azərbaycanın ərazisini Qarabağ erməniləri işğal edib, yoxsa Ermənistanın qoşunları? Hələ indi də həyasızcasına oğlunu göndərmisən erməni ordusunda xidmətə. Hansı ki, bu ordu Azərbaycanın işğal edilən ərazilərində mövqe tutub. Təkrar edirəm ki, bu insan özünün xülyaları ilə yaşayır. Halbuki BMT Baş Assambleyasında əyləşən insanlar realistdirlər və hər şeyi də çox gözəl bilirlər.

- Paşinyan həm deyir ki, sülh danışıqları onun hökumətinin xarici siyasətinin əsas prioritetidir, həm də rəsmi Bakıdan tələb edir ki, danışıqları Dağlıq Qarabağdakı separatçı rejimlə aparsın. Bunu necə anlamaq olar?

- Demaqoqluqla məşğul olur. Adamın sözünün əvvəli ilə sonu bir-birilə ziddiyyət təşkil edir. Əgər Ermənistanın Dağlıq Qarabağ danışıqlarına aidiyyəti yoxdursa, onda sən kimsən danışırsan, ümumiyyətlə kimin adından danışırsan? Və səninlə niyə danışmaq lazımdır? Hesab edirəm ki, Paşinyan ciddi siyasətçi deyil. O, ümumiyyətlə adekvat deyil və qorxuram ki, bundan sonra da düzəlməsin.

- Bu çıxışla Paşinyan BMT-də qarşısına qoyduğu məqsədə çatıb istədiyi ab-hava yarada bildimi?

- BMT-də əyləşənlər realist siyasətçilərdir. Paşinyan heç bir ab-hava yarada bilmədi. Siz düşünürsünüz ki, BMT-də hamı Paşinyanın çıxışına qulaq asırdı?

- Bundan sonra danışıqlar prosesi hansı istiqamətdə irəliləyə bilər?

- Rusiya Prezidenti Vladimir Putin Nikol Paşinyanla danışıb. Putin Bakıya gələcək və biz bu məsələni özümüz üçün müəyyən edəcəyik. Əgər Paşinyanı ağla gətirmək mümkündürsə, Putin onu ağıllandıracaq və danışıqlar prosesi bərpa olunacaq. Yox, əgər ağla gəlmirsə, bu halda Putin əlini ondan çəkməli və Azərbaycan digər variantlara müraciət etməlidir.