Ermənilərdən Azərbaycana qarşı yeni iddia: “İndi də bu əraziləri istəyirlər”

“Politoloqlar rusdilli mətbuatlar vasitəsilə ermənilərin təxribatlarına qarşı məqalələrlə cavab verməlidirlər. Qars müqaviləsini tanımayan Ermənistan Gürcüstanı da siyasi fantaziyasına qataraq anti-türk siyasətə meyləndirir”.

Teleqraf.com xəbər verir ki, bu barədə politoloq Zaur Məmmədov açıqlama verib.

Onun sözlərinə görə, artıq bir neçə gündür ki, ermənilərin əlində olan Rusiya və Ermənistandakı saytlar kütləvi şəkildə Naxçıvan, Şərqi Anadolu torpaqlarına iddialar qaldırır:

“Vaxtı təsadüfi seçməyiblər. İş orasındadır kı, onlar 100 il əvvəl imzalanan Moskva və Qars müqavilələrini heçə sayaraq, guya kamalçılarla bolşeviklərin erməni xalqının torpaqlarını əllərindən aldıqlarını bildirirlər. Onlar utanmayaraq, 1918-1920 ci illərdəki Ermənistan Respublikasına belə istinad edirlər.

Vilson və Avropanın bir neçə dövlətinin beynəlxalq hüququ kobud şəkildə pozan və tarixdə heç bir zaman mövcud olmamış torpaqlarda müsəlman - türk xalqları arasında xristian erməni dövlətini yaratmaq məqsədi qoyan Sevr müqaviləsinə istinad etmək xəstə təxəyyülün göstəricisidir. Paşinyan və Ermənistandakı müxalifət partiyaları bilməlidirlər ki, Azərbaycanın bu istiqamətdə ata biləcəyi addımlar onlarınkından fərqli olaraq real faktlara söykənib”.

Zaur Məmmədov xatırladıb ki, 1918-1920 ci illərdə mövcud olmuş erməni dövlətinin mərkəz şəhəri İrəvan 1918 - ci ildə sənədlərdə göstərildiyi kimi ermənilərin Qarabağdan ən çəkməsi şərtilə ermənilərə verilib:

“Eyni zamanda, 1918-1920 - ci illərdəki Ermənistanın ərazisi SSR zamanı qeyri- qanuni şəkildə Azərbaycan və Gürcüstan hesabına genişləndirilib. Yəni, əgər Ermənistan Qars və Moskva müqavilələrini tanımaqdan imtina edirsə, o zaman Zəngəzur, Göyçə, İrəvanı Azərbaycana qaytarmalıdır. Belə olan təqdirdə, rus mətbuatında ermənilərin həyasızcasına Qars və Moskva müqavilələrinin guya ki, Ermənistan ərazisini kiçiltdikləri kimi səsləndirdikləri tezislər alt - üst olacaq”.