Kremldən Bakıya şok təklif - Ekspert detalları açıqladı

“İrəvan artıq Rusiyanın vasitəçi təklifini dəstəkləyib, Ermənistanın dəstəklədiyi təklif isə Azərbaycanın xeyrinə ola bilməz”.

Teleqraf.com xəbər verir ki, bunu politoloq Elxan Şahinoğlu deyib.

Ekspert Ermənistan və Azərbaycan arasındakı son proseslərə diqqət çəkib:

“Rusiya Azərbaycan-Ermənistan sərhədindəki insidenti tənzimləmək, o cümlədən demarkasiya və delimitasiyanın keçirilməsini həyata keçirmək üçün tərəflərə vasitəçiliyini təklif edib. Bu haqda Rusiyanın Xarici işlər naziri Sergey Lavrov mayın 19-da tacikistanlı həmkarı Sirociddin Muhriddinlə Düşənbədə keçirdiyi mətbuat konfransında bildirib.

Bizim bu təklifə münasibətiniz necə olmalıdır?

Bu suala cavab vermədən öncə başqa suala cavab tapmalıyıq: Rusiyanın vasitəçiliyi nə zaman Azərbaycan üçün faydalı olub? Uzaq və yaxın tariximiz bu suala müsbət cavab vermir. Rusiya hərbçiləri Qarabağda separatçıları tərksilah etmədikləri kimi “İsgəndər – M” raketləri ilə bağlı müəamma da çözülmədi. Rusiya prezidenti Vladimir Putin müharibə günlərində Ermənistana silah-sursat daşıdığını gizlətmədi. İndi bu dövlət Azərbaycanla Ermənistan arasında sərhəddi müəyyənləşdirmək üçün hakim rolunda çıxış etsə nəyin baş verəcəyi üzərindən baş sındırmağa dəyməz. Ona görə də rəsmi Bakı “sərhəddin müəyyənləşməsi iki dövlət arasında danışıqlar vasitəsilə aparılmalıdır” yanaşmasında israrını davam etdirməlidir. Doğrudur, Ermənistanın baş nazir vəzifəsini icra edən Nikol Paşinyanın bu məsələyə münasibəti belədir ki, “Ermənistanla Azərbaycan arasında diplomatik münasibətlər yoxdursa, danışıqlar prosesində Rusiya iştirak etməlidir”. Yəni İrəvan artıq Rusiyanın vasitəçi təklifini dəstəkləyib. Ermənistanın dəstəklədiyi təklif isə Azərbaycanın xeyrinə ola bilməz”.